Education News : शाळा सोडणाऱ्या विद्यार्थी संख्येत कर्नाटक सातव्या क्रमांकावर; पाच वर्षांत 53 हजार मुलांची गळती

बंगळूर : शाळा (School) सोडणाऱ्या विद्यार्थ्यांच्या संख्येत कर्नाटक (Karnataka) देशात सातव्या क्रमांकावर आहे. गेल्या पाच वर्षांत ५३ हजार ४८४ विद्यार्थ्यांनी विविध कारणांमुळे शाळेचा निरोप घेतला आहे.

२०१७-१८ मध्ये नऊ हजार ३६२ मुले, २०१८-१९ मध्ये सहा हजार ८०६, २०१९-२० मध्ये १७ हजार ५२, २०२०-२१ मध्ये सात हजार, २०२१-२२ मध्ये १३ हजार २६२ मुले शाळाबाह्य आहेत. मुले शाळा सोडण्याची अनेक कारणे आहेत. कोविड हे देखील या समस्येचे एक कारण आहे. अत्यंत गरिबी हे त्यातील एक आहे.

पाऊस न झाल्याने राज्यातील बहुतांश भागात दुष्काळी स्थिती आहे. विशेषतः उत्तर कर्नाटकातील नागरिक कामाच्या शोधात स्थलांतर करत आहेत. बंगळूर, म्हैसूर, मंगळूर, शिमोगा, गोवा, कारवार यांसारख्या शहरात जात असताना अनेकजण आपल्या मुलांना सोबत घेऊन जातात. अशा प्रकारे, त्यांना शिक्षणाची संधी मिळाली तरी ते ज्या ठिकाणी जातात, त्या ठिकाणी सरकारी शाळेत प्रवेश घेतीलच याची शाश्वती नसते.

नियंत्रणासाठी उपाययोजना

कर्नाटक मोफत आणि सक्तीचे शिक्षण ६ ते १४ वर्षे वयोगटातील एकही मूल शाळा सोडू नये, यासाठी उच्च न्यायालयाच्या आदेशानुसार राज्यस्तरीय अधिकाऱ्यांची समिती स्थापन करण्यात आली. आंतरविभागीय समन्वय समितीच्या बैठका वेळोवेळी घेतल्या जात आहेत. शाळाबाह्य मुलांना मुख्य प्रवाहात आणण्यासाठी संनियंत्रण केले जात आहे.