वर्गात हिजाब काढेन, पण शाळेत घ्या; विनंती करूनही नाकारला प्रवेश

बंगळुरू : हिजाबवरून राजकारण तापल्यानंतर कर्नाटकमध्ये (Karnataka Hijab Row) शाळा आणि महाविद्यालये बंद ठेवण्यात आले होते. पण, आज शाळा आणि महाविद्यालये पुन्हा सुरू करण्यात आले. यावेळी काही विद्यार्थिनी शाळेत हिजाब घालून आल्या. मात्र, पुन्हा शाळेने त्यांना प्रवेश नाकारला. मांड्या येथील शाळेबाहेर पालक आणि शिक्षकांमध्ये वाद झाल्याचे देखील पाहायला मिळाले.

एक विद्यार्थिनी मांड्या येथील रोटरी स्कूलमध्ये हिजाब घालून आली. तिचे वडील तिला सोडायला आले होते. यावेळी शाळेच्या प्रवेशद्वारावर असलेल्या शिक्षिकेने त्यांना रोखले. त्यानंतर वडिलांनी शाळेत घेण्याची विनंती केली. वर्गात गेल्यानंतर मुलगी हिजाब काढेन. पण तिला शाळेत घ्या, अशी विनंती वडिलांनी केली. तरीही शिक्षिकेने विद्यार्थिनीला प्रवेश नाकारला, असं पालकांनी सांगितलं. याबाबत एएनआयने वृत्त दिले आहे.

नेमका वाद काय? -

कर्नाटकमध्ये गेल्या दोन महिन्यांपासून हिजाबचा वाद सुरू झाला आहे. उडपी येथे हिजाब घातलेल्या विद्यार्थिंनींना महाविद्यालयात प्रवेश नाकारण्यात आला. त्यानंतर त्यांनी शिक्षण विभागाकडे तक्रार केली. मात्र, विद्यार्थ्यांना शालेय गणवेशाच पालन करावं लागेल, असं सरकारने सांगितलं. त्यानंतर विद्यार्थिनींनी न्यायालयात धाव घेतली. पण, विद्यार्थिनी हिजाब घालून आल्या, तर आम्ही भगवे शेले घेऊन येऊ अशी भूमिका हिंदूत्ववादी विद्यार्थ्यांनी घेतली होती. त्यानंतर हा वाद अधिक तीव्र झाला.

फेब्रुवारीमध्ये चिघळला वाद -

सुरुवातीला उडुपीमधून सुरू झालेला वादाचे पडसाद हे आजूबाजूच्या जिल्ह्यात देखील उमटले. अनेक महाविद्यालयांनी हिजाब घातलेल्या विद्यार्थिनींना प्रवेश नाकारला. त्यानंतर विद्यार्थिनी आक्रमक झाल्या. काही दिवसांपूर्वी हिजाब घातलेल्या एका विद्यार्थिनीला भगवे शेले घातलेल्या विद्यार्थ्यांनी घेराव घातला. त्यानंतर हिजाब वादावर देशभरातून टीका झाली. वाद अधिक चिघळल्याने कर्नाटक सरकारने शाळा-महाविद्यालये बंद ठेवली होती. आता पुढील निर्देश येईपर्यंत शाळेत गणवेशात जावे, असे आदेश कर्नाटक उच्च न्यायालयाने दिले आहेत. त्यानंतर शाळा-महाविद्यालये सुरू करण्यात आले आहेत.