Hijab Row : याचिकाकर्त्या मुलीच्या कुटुंबीयांवर हल्ला? भाऊ गंभीर जखमी

बंगळुरू : कर्नाटकातील हिजाब वाद (Karnataka Hijab Row) अद्यापही शांत झालेला नाही. हिजाब परिधान करण्याची मागणी करणारी याचिका कर्नाटक उच्च न्यायालयात (Karnataka High Court) दाखल केलेल्या याचिकाकर्त्या मुलीच्या कुटुंबीयांवर कथितरित्या हल्ला झाल्याचा प्रकार समोर आला आहे. यामध्ये तिचा भाऊ गंभीर जखमी झाला आहे. तसेच वडिलांच्या हॉटेलची तोडफोड करण्यात आली आहे.

हजरा शिफा, असे या याचिकाकर्त्या मुलीचं नाव आहे. हिजाब घातल्यानं महाविद्यालयात प्रवेश नाकारला होता. त्यामुळे तिने कर्नाटक उच्च न्यायालयात धाव घेतली होती. सध्या हिजाब वादावर न्यायालयात सुनावणी सुरू आहे. पण, २१ फेब्रुवारीला शिफाच्या वडिलांच्या हॉटेलवर हल्ला करण्यात आला. यामध्ये तिचा भाऊ गंभीर जखमी झाला. संघ परिवाराच्या गुंडांनी हा हल्ला केल्याचा आरोप हजरा शिफाने केला आहे. तसेच त्या लोकांवर कारवाई करण्यात मागणी देखील तिने केली आहे. याबाबत तिने ट्विट केले असून भावावर रुग्णालयात उपचार सुरू असल्याचं सांगितलं आहे. याबाबत इंडिया टुडेनं वृत्त दिले आहे.

हजरा शिफाचं ट्विट नेमकं काय? -

“माझ्या भावावर जमावाने क्रूरपणे हल्ला केला. मी माझ्या हिजाबच्या हक्कासाठी न्यायालयात लढत आहे. तो माझा हक्क आहे. पण, आमच्यावर हल्ला करण्यात आला. यामध्ये आमच्या मालमत्तेचं नुकसान झालं आहे. माझा भाऊ जखमी झाला असून त्याच्यावर उपचार सुरू आहेत. मी माझा हक्क देखील मागू शकत नाही का? संघ परिवाराच्या गुंडांनी हे केलं असून त्यांच्यावर कारवाई करावी. त्यांचा पुढचा बळी कोण असेल?'' असे आरोप तिने ट्विटमधून केले आहेत.

दरम्यान, गेल्या अडीच महिन्यापासून हिजाबवरून वाद सुरू आहे. फेब्रुवारी महिन्यात हा वाद टोकाला पोहोचला. हिजाब प्रकरण कर्नाटक उच्च न्यायालयात पोहोचलं असून आज दुपारी अडीच वाजता पुन्हा सुनावणी घेण्यात येणार आहे.