12 तासात 5 दहशतवाद्यांना कंठस्नान; सुरक्षा दलाला मोठं यश

श्रीनगर - जम्मू काश्मीरमध्ये (Jammu And Kashmir) सुरक्षा दलाने गेल्या १२ तासात लष्कर ए तोयबा (LeT) आणि जैश ए मोहम्मदच्या (JeM) पाच दहशतवाद्यांचा खात्मा केला. दोन वेगवेगळ्या चकमकीत मिळून ५ दहशतवाद्यांना कंठस्नान घालण्यात सुरक्षा दलाला यश आले. ठार झालेल्या दहशतवाद्यांमध्ये जैशचा कमांडर जाहीद वाणी (Jahid Wani) याच्यासह एका पाकिस्तानी (Pakistan) दहशतवाद्याचा समावेश आहे. काश्मीरच्या आय़जीपींनी हे सुरक्षा दलाचे मोठे यश असल्याचं म्हटलं आहे.

जम्मू काश्मीरच्या पोलिसांनी दिलेल्या माहितीनुसार, शनिवारी रात्री बडगाम जिल्ह्यातील चरार ए श्रीफ आणि पुलवामा जिल्ह्यात नायरा इथं सुरक्षा दलाने शोधमोहिम राबवली. यावेळी बडगाममध्ये एक आणि पुलवामात चार दहशतवाद्यांना कंठस्नान घालण्यात आले. त्यांच्याकडून शस्त्रसाठा जप्त करण्यात आला आहे.

जाहिद मंजूर वाणी हा जम्मू काश्मीरमध्ये जैशच्या टॉप कॅडरपैकी एक होता. तो पुलवामा हल्ल्यात सहभागी होता. २०१९ मध्ये झालेल्या या हल्ल्यात सीआरपीएफचे ४० जवान शहीद झाले होते. जम्मू काश्मीरमध्ये शनिवारी सायंकाळी पुन्हा एकदा दहशतवाद्यांकडून भीती पसरवण्याचा प्रयत्न केला गेला. कुलगाम जिल्ह्यात पोलिस कर्मचाऱ्याच्या हत्येनंतर पुलावामातील नायरा भागात सुरक्षादलांनी गोळीबार केला. तसंच घटनास्थळी मोठ्या प्रमाणावर फौजफाटाही तैनात करण्यात आला होता.