तेजस्वींचा प्रश्न; देशात एकच घोटाळा झाला आहे का? एकच नेता आहे का?

चारा घोटाळ्याशिवाय देशात दुसरा कोणताही घोटाळा झाला नाही का? एकट्या बिहारमध्ये ८० घोटाळे झाले. सीबीआय, ईडी आणि एनआयए कुठे आहेत? देशात एकच घोटाळा झाला आहे का? आणि एकच नेता आहे का? विजय मल्ल्या, नीरव मोदी आणि मेहुल चोक्सी यांना सीबीआय विसरली आहे, असे प्रश्न लालू प्रसाद यादव यांचा मुलगा आणि राज्याचे माजी उपमुख्यमंत्री तेजस्वी यादव (tejashwi yadav) यांनी एजन्सींवर उपस्थित केले.

लालू प्रसाद यादव (lalu prasad yadav) यांना चारा घोटाळ्याप्रकरणी (Fodder scam) पाच वर्षांची शिक्षा आणि ६० लाखांचा दंड ठोठावण्यात आला आहे. मी न्यायालयाच्या निर्णयावर भाष्य करणार नाही. हा अंतिम निर्णय नाही. उच्च न्यायालय आणि सर्वोच्च न्यायालयही देशात आहेत. या निर्णयाला आम्ही उच्च न्यायालयात आव्हान दिले आहे. कनिष्ठ न्यायालयाचा निर्णय उच्च न्यायालयात फिरवला जाईल, अशी आम्हाला आशा आहे, असेही तेजस्वी यादव (tejashwi yadav) म्हणाले.

लालूजींनी भाजपशी हातमिळवणी केली असती तर त्यांना राजा हरिश्चंद्र म्हटले गेले असते. परंतु, ते आरएसएस आणि भाजपविरोधात लढले. त्यामुळे त्यांना तुरुंगवास भोगावा लागत आहे. याला आम्ही घाबरणार नाही, असेही तेजस्वी यादव (tejashwi yadav) म्हणाले.

‘मी अन्याय, असमानता, हुकूमशाही, जुलमी सत्तेविरुद्ध लढेन’, असे ट्विट लालू प्रसाद यादव (lalu prasad yadav) यांनी केले. लालू प्रसाद यादव यांची पाच वर्षांची शिक्षा कायम राहिल्यास तुरुंगात जावे लागेल आणि ते निवडणुकीच्या हंगामात उतरू शकणार नाहीत. असे झाले तर बिहारच्या राजकारणातील मोठा पक्ष असलेल्या आरजेडीसाठी हा मोठा धक्का असेल.