कोलकत्ता : शत्रुघ्न सिन्हा, सुप्रियो यांना तृणमूल काँग्रेसची उमेदवारी

कोलकता : पश्‍चिम बंगालमधील असनसोल लोकसभा मतदारसंघात होणाऱ्या पोटनिवडणुकीसाठी तृणमूल काँग्रेसने शत्रुघ्न सिन्हा यांना आज उमेदवारी जाहीर केली. तसेच बालीगंज विधानसभा मतदारसंघात होणाऱ्या पोटनिवडणुकीसाठी भाजपचे माजी नेते व माजी मंत्री बाबूल सुप्रियो यांना तृणमूलने उमेदवारी दिली आहे.

तृणमूल काँग्रेसच्या सर्वेसर्वा ममता बॅनर्जी यांनी ट्विट करून या नावांची घोषणा केली. ‘‘अखिल भारतीय तृणमूल काँग्रेसच्या वतीने माजी केंद्रीय मंत्री आणि प्रसिद्ध अभिनेते शत्रुघ्न सिन्हा हे असनसोलमधून लोकसभा पोटनिवडणुकीत आमचे उमेदवार असतील हे जाहीर करताना आनंद होत आहे. याशिवाय माजी केंद्रीय मंत्री आणि प्रसिद्ध गायक बाबुल सुप्रियो हे बालीगंज येथून विधानसभा पोटनिवडणूक लढवणार आहेत. जय हिंद, जय बांगला, जय माँ-मांटी- मानुष!, ’’ असे ट्विट ममता बॅनर्जी यांनी केले आहे.

भाजपच्या तिकिटावर दोन वेळा निवडून आलेले बाबूल सुप्रियो यांनी राजीनामा दिल्याने असनसोल लोकसभा मतदारसंघात पोटनिवडणूक होत आहे. सुप्रियो यांनी खासदारकीचा राजीनामा देतानाच भाजपमधून बाहेरपडून तृणमूल काँग्रेसमध्ये प्रवेश केला आहे. सुरुवातीला त्यांनी आपण आता राजकारणापासून दूर जात असल्याचे म्हटले होते. नंतर मात्र त्यांनी तृणमूलमध्ये जाण्याचा निर्णय घेतला. सुप्रियो हे गेल्या लोकसभा निवडणुकीत असनसोल मतदारसंघातून विजयी झाले होते. त्यांची केंद्रीय मंत्रिपदीही वर्णी लागली होती. परंतु, २०२१मधील केंद्रीय मंत्रिमंडळ विस्तारात त्यांना वगळण्यात आले. त्यामुळे नाराज होऊन त्यांनी पक्ष सोडल्याचे बोलले जाते.

शत्रुघ्न सिन्हा हे २००९ आणि २०१४ या दोन लोकसभा निवडणुकीत बिहारमधील पाटणा साहिब मतदारसंघातून निवडून आले होते. त्यानंतर ते पंतप्रधान नरेंद्र मोदी यांनी केंद्रीय गृहमंत्री अमित शहा यांच्यावर टीका करत भाजपमधून बाहेर पडण्याचा निर्णय घेतला होता व ते काँग्रेसमध्ये दाखल झाले होते. शुत्रघ्न सिन्हा यांनी २०१९मधील लोकसभेची निवडणूक पाटणा साहिब मतदारसंघातूनच काँग्रेसच्या तिकिटावर लढविली होती. मात्र त्यांचा पराभव झाला. आता त्यांनी तृणमूल काँग्रेसमध्ये प्रवेश केला आहे.