१४४ वर्षे जुन्या क्लबची इमारत आगीत खाक; कोट्यवधींचे नुकसान

हैदराबाद - देशातील (India) सर्वात जुन्या पाच क्लब पैकी एक असणाऱ्या सिकंदराबाद (Secunderabad) क्लबच्या इमारतीला रविवारी पहाटे आग लागली. आग इतकी भीषण होती की या आगीत इमारत जळून खाक झाली आहे. यात कोट्यवधींचे नुकसान झाल्याचं म्हटलं जात आहे. हैदराबादमध्ये (Hyderbad) असलेल्या क्लबच्या इमारतीत पहाटे ३ च्या सुमारास आगीने रौद्र रुप धारण केलं, सकाळी सातच्या सुमारास आग आटोक्यात आली.

याबाबत मिळालेली माहिती अशी की, मध्यरात्री इमारतीला भीषण आग लागली. तीनच्या सुमारासर आग आटोक्यात आणण्यासाठी अग्निशमन दलाच्या १० गाड्या घटनास्थळी दाखल झाल्या होत्या. अखेर ४ तासांच्या अथक प्रयत्नानंतर आग आटोक्यात आली. सध्या बचावकार्य सुरु असून यात जिवित हानी झाली नसली तरी मोठ्या प्रमाणावर वित्त हानी झाली आहे.

सध्या सुट्ट्या असल्यामुळे क्लबच्या इमारतीमध्ये कोणीही पाहुणे नव्हते. जिवित हानी नसली तरी अंदाजे २० कोटी रुपयांचे नुकसान झाल्याचं म्हटलं जात आहे. आग लागल्यानं इमारत जळून खाक झाली आहे. आगीचं कारण अद्याप समोर आलेलं नाही, मात्र शॉर्ट सर्किटने आग लागल्याचं सांगितलं जात आहे.

इंग्रजांच्या काळात १८७८ मध्ये हा क्लब स्थापन करण्यात आला होता. जवळपास १४४ वर्षांपूर्वीचा हा क्लब २० एकर परिसरात पसरला आहे. देशातील पाच सर्वात मोठ्या आणि प्रतिष्ठित क्लबपैकी एक असा हा क्लब आहे. याठिकाणी शहरातील मोठे अधिकारी, श्रीमंत उद्योगपती येतात. सर्वसामान्य लोकांना या क्लबमध्ये प्रवेश दिला जात नाही.