मेहुल चोक्सीने गर्लफ्रेंडलाच दिली खोटी हिऱ्याची अंगठी

नवी दिल्ली: मेहुल चोक्सीच्या (Mehul Choksi) अपहरणामध्ये माझी काही भूमिका नाहीय, असा दावा बार्बरा जाराबिकाने (Barbara Jarabica)केला आहे. बार्बरा जाराबिका पीएनबी बँक घोटाळ्यातील आरोपी मेहुल चोक्सीची कथित गर्लफ्रेंड आहे. "मागच्यावर्षी मी अँटिग्वाला गेले होते. त्यावेळी मेहुल चोक्सीने माझ्याशी संपर्क साधला व राज अशी स्वत:ची ओळख करुन दिली" बार्बराने इंडिया टुडेला दिलेल्या मुलाखतीत हा दावा केला आहे. (Mehul Choksi flirted with me gifted fake diamond rings Barbara Jarabica)

"माझी मेहुल चोक्सीबरोबर मैत्री होती. चोक्सीने राज म्हणून स्वत:ची ओळख करुन दिली होती. त्याने आधी मैत्री केली. त्यानंतर माझ्या बरोबर जवळीक साधण्याचा प्रयत्न सुरु केला. त्याने मला हिऱ्याची अंगठी आणि ब्रेसलेट दिले. पण ते बनावट निघाले" असे बार्बरा जाराबिकाने सांगितले.

"चोक्सीचे वकिल आणि कुटुंबियांनी माझे नाव यामध्ये खेचले. माझा या अपहरणाशी काहीही संबंध नाही. माझे नाव यामध्ये खेचण्यात आले आहे. मी आणि माझे कुटुंबीय तणावाखाली आहोत" असे बार्बरा जाराबिकाने सांगितले. अँटिग्वा पोलिसांना लिहिलेल्या पत्रात मेहुल चोक्सीने बार्बरा जाराबिकाच्या घरातून माझे अपहरण झाले व मला बोटीने डॉमिनिकाला नेण्यात आल्याचे म्हटले आहे. बोटीवर दोन भारतीय सुद्धा होते. त्यांनी मला अँटिग्वा बाहेर काढले, असा दावा मेहुल चोक्सीने केला आहे.