Omicron वर बायोएनटेक आणणार प्रभावी लस! दिलासादायक बातमी

कोवीडचा नवा व्हेरिएंट ओमीक्रॉनची (omicron) सध्या जगभरात दहशत निर्माण झाली आहे. पण याच (omicron) ऑमीक्रॉन व्हेरिएंटवर प्रभावी लस शोधण्याचं काम बायोएनटेक (Bioentech) कंपनीनं सुरु केलं आहे. व्हेरिएंटचा धोका वाढल्यास पुढील 100 दिवसांत लस बाजारात आणण्याची तयारी बायोएनटेकनं दर्शवली आहे

100 दिवसांच्या आत नवी लस

ओमिक्रॉन व्हेरियंटचा धोका वाढलाच तर जास्तीत जास्त 100 दिवसांच्या आत यावरची नवी लस बाजारात आणण्याची तयारी असल्याचं बायोएनटेकच्या प्रवक्त्यांनी सांगितलं आहे. बायोएनटेकची सध्याची लस ओमिक्रॉनवर किती प्रभावी ठरते हे निरीक्षणानंतर येत्या दोन आठवड्यात कळेल आणि त्या निष्कर्षावर आधारीत आवश्यक बदल लसीमध्ये केले जातील. बायोएनटेक ही अमेरिकेत फायझर (Pfizer) सोबत मिळून कोवीड लस विकसित करणारी कंपनी आहे. ओमिक्रॉनचा संसर्ग पसरत असल्याचं लक्षात येताच कंपनीनं त्यावर काम करणं सुरु केलं असल्याचं बायोएनटेककडून सांगण्यात येतंय.

लसीमध्ये आवश्यक ते बदल करणार

फायझर आणि बायोएनटेक कंपनीनं म्हटलं की, ''आम्हांला आशा आहे की, आम्ही ओमिक्रॉन व्हेरिएंटवर 100 दिवसांत प्रभावी लस संशोधन आणि उत्पादन करण्यात सक्षम आहोत. कोरोनाचा नवा व्हेरिएंट आधीच्या व्हेरिएंटपासून खूप वेगळा आहे.'' कंपनीनं महिनाभर आधीच ओमिक्रॉन व्हेरिएंटवर लस बनवण्याची तयारी सुरु केल्याचं सांगितलं आहे. ओमिक्रॉन (B.1.1.529) जगभरात पसरण्याची शक्यता गृहीत धरुन लसीमध्ये आवश्यक ते बदल करत असल्याचं कंपनीकडून सांगण्यात आलं आहे.