गोव्याच्या मंत्र्याचा राजीनामा; सेक्स स्कँडलमध्ये सहभाग असल्याचा आरोप

पणजी: गोव्यातील काँग्रेसच्या अध्यक्षांनी आज मिलिंद नाईक यांचा ‘सेक्स स्कँडल’मध्ये सहभाग असल्याचा आरोप केला आहे. त्यानंतर आता मिलिंद नाईक यांनी गोवा सरकारमधील मंत्रिपदाचा राजीनामा दिला आहे. मुख्यमंत्री कार्यालयाने म्हटलंय की, या प्रकरणाची मुक्त आणि निष्पक्ष चौकशी व्हावी म्हणून हा राजीनामा स्वीकारण्यात आला असून तो राज्यपालांकडे पाठवण्यात आला आहे.

मुरगावचे भाजप आमदार मिलिंद नाईक हे बिहारमधील एका महिलेचे लैंगिक शोषण झालेल्या कथित सेक्स स्कँडलमध्ये सहभागी असल्याचा आरोप आहे. प्रदेश काँग्रेसचे अध्यक्ष गिरीश चोडणकर यांनी सांगितलंय की, नाईक यांचा सहभाग सिद्ध करणारा व्हिडिओ त्यांनी स्वतः पाहिला होता. दोन दिवसांपूर्वी चोडणकर यांनी राज्यपाल पीएस श्रीधरन पिल्लई यांची भेट घेतली होती. तसेच या स्कँडलमधील त्यांच्या कथित सहभागामुळे नाईक यांना भाजपच्या मंत्रिमंडळातून वगळण्यात यावे, अशी मागणी केली होती.