Defection of MPs : बसपच्या अर्ध्याअधिक खासदारांचे पक्षांतर

नवी दिल्ली - उत्तर प्रदेशात बहुजन समाज पक्षाच्या (बसप) अर्ध्याअधिक खासदारांनी आगामी लोकसभा निवडणुकीच्यापूर्वी दुसऱ्या पक्षात जाणे पसंत केले आहे. आतापर्यंत सात खासदारांनी आपल्या निष्ठा बदलल्या आहेत.

२०१४ च्या लोकसभा निवडणुकीत बसपचा एकही खासदार निवडून आला नव्हता. परंतु २०१९ च्या निवडणुकीत समाजवादी पक्षाच्या (सप) आणि बसप या पक्षांची आघाडी झाली होती. यात बसपाचे दहा खासदार निवडून आले होते. परंतु या खासदारांपैकी आतापर्यंत सात खासदारांनी एकतर दुसऱ्या पक्षात प्रवेश केला आहे किंवा पक्षांतराचे संकेत दिले आहेत.

आंबेडकरनगर लोकसभा मतदारसंघाचे बसपचे खासदार रितेश पांडे यांनी नुकताच भाजपमध्ये प्रवेश केला आहे. त्यांचे वडील राकेश पांडे हे सपचे आमदार आहेत. परंतु आंबेडकरनगर मतदारसंघात सपने लालजी वर्मा यांची उमेदवारी घोषित केल्यानंतर लगेच दुसऱ्या दिवशी रितेश पांडे यांनी भाजपला जवळ केले.

दानिश काँग्रेसमध्ये

भाजप खासदार रमेश बिधुडी यांच्या वक्तव्यानंतर चर्चेत आलेले अमरोहाचे बसपचे खासदार दानिश अली काँग्रेसमध्ये जाणार आहेत. ते भारत जोडो यात्रेत सहभागी झाले. याशिवाय बसपचे आणखी काही खासदार हे भाजपच्या वाटेवर आहेत.