Navratri Special Story : वडील दिव्यांग, घरची जबाबदारी खांद्यावर उचलत पोरीनं उभारला १ कोटींचा व्यवसाय

Navratri Special Story : अवघ्या ११ वर्षांची मुलगी श्रद्धा धवन. या वयात मुलं शाळा शिकतात. आणि शाळेतून घरी आले की मित्रांबरोबर खेळतात आणि अभ्यास करतात. मात्र श्रद्धाने या वयात तिचे दिव्यांग वडील सत्यवान यांना म्हशींचे दूध काढण्यापासून ते जवळच्या डेअरीपर्यंत पोहोचवण्याच्या दैनंदिन कामात मदत केली. त्यावेळी हा उद्योग पुढे तिच्या आयुष्याला कलाटणी देणारा ठरेल याचा विचारही तिने केला नसावा. आज श्रद्धाचा व्यवसाय १ कोटींच्या घरात पोहोचलाय.

श्रद्धा फक्त 13-14 वर्षांची होती तोपर्यंत, श्रद्धाने म्हशींच्या व्यापाराच्या व्यवसायातील गुंतागुंत, म्हशींचे दूध काढण्याच्या कलेपासून ते व्यापाऱ्यांशी चतुर वाटाघाटी करण्यापर्यंतच्या गोष्टी आत्मसात केल्या होत्या. व्यवसायासाठीचे तिचे समर्पण आणि कुटुंबाकडून आत्मसात केलेले व्यावसायिक कौशल्य तिच्याकडे होते.

वयाच्या २४ व्या वर्षी, श्रद्धाने भौतिकशास्त्रात एमएससी केले आहे. ती महाराष्ट्रातील अहमदनगर जिल्ह्यातील निघोज गावात असलेल्या तिच्या डेअरी फार्मची मालकीण आहे. हे फार्म दुमजली असून यात 80 म्हशी आहेत.

बिझनेस स्ट्रॅटेजी

श्रद्धाने म्हशीच्या व्यापारातून विचारपूर्वक दुग्धव्यवसायाकडे तिचा कल वळवला. कर्जाची गरज पडू नये म्हणून तिने हुशारीने तिचा नफा गुरांचा विस्तार करण्यासाठी पुन्हा गुंतवला. 2017 पर्यंत, तिच्या शेतात 45 म्हशी होत्या. तिने दुधाची गुणवत्ता वाढवण्यावर लक्ष केंद्रित केले. तिने गुरांना दिलेला पोषक आहार तिला बाजारात उच्च दर मिळवून देण्यास फायदेशीर ठरला.

एवढ्यावरच न थांबता श्रद्धाने तिच्या व्यवसायात विविधता आणली. CS Agro Organics या ब्रँड अंतर्गत मार्केटिंग करून दर महिन्याला तिने 30,000 किलो गांडूळखत तयार करून गांडूळखत निर्मितीच्या व्यवसायातही पाऊल टाकले. शिवाय, तिने एक बायोगॅस प्लांट लावून घेतला जो वीज निर्मितीसाठी म्हशीच्या स्लरीचा वापर करतो, ज्यामुळे तिचे डेअरी फार्म गार्बेजलेस बनते.