Union Budget 2023: आपल्या आईला बजेट सांगतांना बघून भारावून गेली निर्मला सीतारामन यांची मुलगी..

Union Budget 2023: केंद्रीय अर्थमंत्री निर्मला सीतारामन यांनी आज २०२४ च्या लोकसभा निवडणुकीपूर्वीचे मोदी सरकारचे शेवटचे पूर्ण बजेट संसदेत सादर केले. आज जेव्हा त्या २०२३-२४ चे आर्थिक वर्षाचे बजेट सादर करत होत्या तेव्हा लोकसभेच्या प्रेक्षक गॅलरीत त्यांची मुलगी आणि नातेवाईक सुद्धा उपस्थित होते.

नरेंद्र मोदी सरकारच्या सध्याच्या कारकिर्दीचा हे शेवटचे पूर्ण बजेट असल्याने लोकसभेची गॅलरी, हे बजेट ऐकण्यासाठी आलेल्या लोकांनी खचाखच भरलेली होती. या लोकांमध्ये निर्मला सीतारामन यांची मुलगी वांग्मयी परकाला आणि त्यांचे नातेवाईक होते.

सीतारामन यांनी बजेटच्यावेळी अनेक प्रस्तावांची घोषणा केल्याने त्यांच्या नोंदी रेल्वेमंत्री अश्विनी वैष्णव आणि लोकसभेच्या गॅलरीत बसलेले राज्यसभेचे अनेक सदस्य नोट्स लिहितांना दिसले.

अर्थमंत्र्यांनी आपल्या अर्थसंकल्पीय भाषणात सांगितलं की, जागतिक अनिश्चिततेमध्ये सुद्धा देशाची आर्थिक वाढ ही सकारात्मक असल्याने जगाने भारताला नक्कीच एक चमकता तारा म्हणून ओळखले आहे.

त्या म्हणाल्या की, चालू आर्थिक वर्षात भारताचा सात टक्के विकास दर हा प्रमुख अर्थव्यवस्थांमध्ये सर्वाधिक आहे आणि भारताची अर्थव्यवस्था योग्य मार्गावर जात आहे.

स्वातंत्र्याच्या ७५ व्या वर्षात जगाने भारताला एक चमकता तारा म्हणून ओळखले आहे आणि जगाने देशाच्या कामगिरीचे सर्वत्र कौतुक सुरू आहे.