लसीचा तिसरा डोस घ्यावा लागणार का? केंद्रानं कोर्टात दिली माहिती

कोरोना रोखण्यासाठी जगभरात लसी दिली जात आहे. काही लसीचा एक बुस्टर डोस आहे. तर काही ठिकाणी दोन डोस झाल्यानंतर तिसऱ्या डोसला सुरुवात केली आहे. दोन्ही डोसनंतरही शरीरातील कोरोनाविरूद्धची प्रतिपींडे (ॲन्टीबॉडी) कमी होत असल्याचे ‘लान्सेट’च्या शोधनिबंधातून स्पष्ट होते. त्यामुळेच भारतातही कोरोनाप्रतिबंधक लसीचा तिसरा डोस दिला जाणार का? असा प्रश्न सर्वसामान्य जनतेला पडला आहे. त्यातच केरळ येथील कन्नूरमधील गिरीश कुमार यांनी लसीचा तिसरा डोस दिला जावा यासाठी कोर्टात याचिका केली होती. या सुनावणीदरम्यान केंद्राकडून तिसरा डोस दिला जाणार नसल्याचं स्पष्ट करण्यात आलं.

कोरोना महामारीचा संसर्ग रोखण्यासाठी लसीचे दोन डोस घेतल्यानंतर तिसरा डोस घेण्याची कोणतीही तरतूद नाही. तिसऱ्या डोसबाबात अद्याप कोणतीही मार्गदर्शक सूचनाही नाहीत. त्यामुळे लसीचा तिसरा डोस देता येणार नाही, असे स्पष्टीकरण केंद्र सरकारने केरळ उच्च न्यायालयात दिले. यावेळी केंद्राने असेही स्पष्ट केले की, कोरोना लसीचा तिसरा डोस घेतल्यानंतर लसीच्या अतिवापरामुळे आरोग्यावर विपरीत परिणाम होण्याची शक्यता जास्त आहे. त्यामुळे तज्ज्ञांच्या सल्ल्यानंतर तिसऱ्या डोसबाबत निर्णय घेण्यात येईल.

लसीचा तिसरा डोस दिला जावा, यासाठी कन्नूरमधील गिरीश कुमार यांनी याचिका दाखल केली होती. सौदी अरेबियात काम करणारे गिरीश कुमार सध्या भारतात असून त्यांनी कोव्हॅक्सिन लसीचे दोन डोस पूर्ण केले आहेत. मात्र, विदेशात कोव्हॅक्सनला परवानगी मान्यता नाहीय. त्यामुळे गिरीश कुमार यांना सौदी अरेबियाला जात येत नाही. नोकरी गमावण्याचा धोका लक्षात घेऊन गिरीश यांनी दोन डोस घेतल्यानंतरही तिसरा डोस दिला जावा, अशी याचिका दाखल केली होती. या याचिकेच्या सुनावणीवेळी केंद्राने कोरोना लसीचा तिसरा डोस देणार नाही, असे सांगत स्पष्ट शब्दांत नकार दिला.