Lok Sabha Election 2024 : सुरतमधील काँग्रेसचे लोकसभा उमेदवारावर पक्षाची कारवाई! सहा वर्षांसाठी केलं निलंबित

अहमदाबाद : यंदाच्या लोकसभा निवडणुकीतील भाजपचा पहिला विजय नोंदल्या गेलेल्या सुरत मतदारसंघातील काँग्रेसचे उमेदवार निलेश कुंभानी यांना पक्षाने सहा वर्षांसाठी निलंबित केले आहे. या निवडणुकीत कुंभानी यांचा अर्ज बाद ठरल्याने आणि त्यानंतर इतर उमेदवारांनी अर्ज माघारी घेतल्याने भाजपचे मुकेश दलाल यांना बिनविरोध विजयी घोषित करण्यात आले होते.

भाजपच्या उमेदवाराचा विजय व्हावा, म्हणूनच कुंभानी यांनी हेतुपुरस्सर अर्जात त्रुटी ठेवल्याचा निष्कर्ष काँग्रेसच्या शिस्तपालन समितीने काढला. कुंभानी यांच्या अर्जात प्रस्तावक म्हणून नाव असलेल्या व्यक्तींच्या सह्या बनावट असल्याचे निदर्शनास आल्यानंतर आयोगाने त्यांचा अर्ज बाद केला होता. काँग्रेसने आणखी एका उमेदवारालाही अपक्ष म्हणून उभे केले होते. त्यांचाही अर्ज बाद झाला होता. यामुळे काँग्रेसची नाचक्की झाली होती.

काँग्रेसने शिस्तपालन समिती स्थापन करत प्रकरणाची चौकशी केली आणि आज एक निवेदन प्रसिद्ध करत कुंभानी यांना सहा वर्षांसाठी निलंबित केल्याचे जाहीर केले. ‘कुंभानी यांचे कृत्य भाजपला मदत करणारे असल्यानेच त्यांच्यावर कारवाई करण्यात आली आहे. कुंभानी यांना त्यांचे म्हणणे मांडण्यासाठी पुरेसा वेळ दिला होता. मात्र, बाजू मांडण्याऐवजी त्यांनी संपर्कच टाळला,’ अशी नाराजीही काँग्रेसने व्यक्त केली आहे. कुंभानी यांचा अर्ज रद्द झाल्यानंतर भाजपने इतर आठ उमेदवारांना अर्ज माघारी घ्यायला लावत सुरतच्या नागरिकांचा मतदानाचा हक्क हिरावून घेतला, अशी टीकाही काँग्रेसने केली.