पंतप्रधान मोदी आज करणार काशी विश्वनाथ धामचे उद्घाटन

नवी दिल्ली : पंतप्रधान नरेंद्र मोदी (PM Narendra Modi) आज वाराणसी इथे श्री काशी विश्वनाथ धामचे उदघाटन (Kashi Vishwanath Corridor Inauguration) करणार आहेत. श्री काशी विश्वनाथ मंदिराला गंगा नदीच्या सर्व किनाऱ्यांशी जोडण्याचे पंतप्रधानांचे स्वप्न या प्रकल्पामुळे प्रत्यक्षात साकार होत आहे. यावेळी १२ राज्यांचे मुख्यमंत्री देखील उपस्थित राहणार आहेत.

पंतप्रधान मोदी सोमवारी सकाळी वाराणसी विमानतळावर पोहोचतील आणि त्यानंतर हेलिकॉप्टरने संपूर्णानंद संस्कृत विद्यापीठाच्या परिसरात जातील. त्यानंतर ते काल भैरव मंदिराकडे प्रस्तान करतील आणि नंतर कॉरिडॉरला लागून असलेल्या घाटावर जलमार्गाने जातील. पंतप्रधान मोदी घाटातून काशी विश्वनाथ धाम येथे पोहोचतील आणि त्यानंतर कॉरिडॉरचे उद्घाटन करतील. त्यानंतर नवीन कॉरिडॉरच्या आवारात फेरफटका मारून उभारलेल्या इमारतींची पाहणी करतील. हा कार्यक्रम सुमारे दोन-तीन तास चालणार आहे.

पर्यावरण रक्षणाचा संदेश देण्यासाठी नव्याने बांधण्यात आलेल्या काशी कॉरिडॉरला रुद्राक्ष, बाईल, पारिजात, आवळा, अशोक वृक्षांनी सुशोभित केले जाणार आहे. मंदिर परिसर आणि मंदिर चौकात झाडे लावण्यासाठी विशेष व्यवस्था करण्यात आली आहे. विविध धार्मिक कार्यक्रमांसाठी आणि सुविधांसाठी विविध इमारती बांधण्यात आल्या आहेत. विश्वनाथ धाममध्ये तीन प्रवासी सुविधा केंद्रे उभारण्यात आली आहेत. तसेच भक्तांसाठी लॉकर, तिकीट काउंटर, पूजा साहित्य विक्रीची दुकाने आदी सुविधा उपलब्ध असतील.

१२ राज्यांच्या मुख्यमंत्र्यांची उपस्थिती -

वाराणसी येथे सोमवारपासून 12 भाजपशासित राज्यांचे मुख्यमंत्री दोन दिवसीय परिषदेला उपस्थित राहतील. आसाम, अरुणाचल प्रदेश, गोवा, गुजरात, हरियाणा, हिमाचल प्रदेश, कर्नाटक, मध्य प्रदेश, मणिपूर, त्रिपुरा, उत्तर प्रदेश आणि उत्तराखंड या राज्यांच्या मुख्यमंत्र्यांच्या आणि बिहार आणि नागालँडच्या उपमुख्यमंत्र्यांचा सहभाग असणार आहे.