पंतप्रधान मोदींकडून स्टार्टअपला मोठं गिफ्ट; 1 हजार कोटींच्या फंडाची घोषणा

नवी दिल्ली - पंतप्रधान नरेंद्र मोदी यांनी शनिवारी स्टार्टअपला प्रोत्साहन देण्यासाठी 1 हजार कोटी रुपयांच्या स्टार्टअप फंडाची घोषणा केली आहे. याबाबत माहिती देताना ते म्हणाले की, स्टार्टअपच्या माध्यमातून देशात ई टॉयलेट ते पीपीई कीट आणि दिव्यांगांसाठी सेवा देण्याच्या क्षेत्रात काम केले जात आहे. यामध्ये भविष्य बदलण्याची ताकद आहे. येत्या काही दिवसात स्टार्टअपसाठी निधी उपलब्ध करून देण्यासाठी गॅरंटी देण्यासाठीही पावले उचलली जातील.

मोदींनी शनिवारी व्हिडिओ कॉन्फरन्सच्या माध्यमातून Startup India International Summit: Prarambh कार्यक्रमात मार्गदर्शन केले. मोदींनी एक टीव्ही शो स्टार्टअप चॅम्पियन्स कार्यक्रमाचे उद्घाटन केले. हा कार्यक्रम दूरदर्शनवर दाखवण्यात येणार आहे. कार्यक्रमावेळी मोदींनी भारतात चेन्नई, भोपाळ, गाझियाबाद, सोनीपतसह इतर अनेक ठिकाणच्या स्टार्टअप कामांबद्दल माहिती घेतली. 

हे वाचा - दोन्ही कोराना लशी सुरक्षित, अफवांपासून सावध राहा; PM मोदींच्या भाषणातील प्रमुख मुद्दे

देशात सध्या 41 हजारांहून अधिक स्टार्टअप मोहिमेत सामिल असून यातील 5 हजार 700 हून अधिक आयटीमध्ये तर 1700 पेक्षा जास्त कृषी क्षेत्रात आहेत. गेल्या पाच वर्षात ही परिस्थिती असून 2014 च्या आधी देशात फक्त चार स्टार्टअप यूनिकॉर्न क्लबमध्ये होते. आज ही संख्या 30 पेक्षा जास्त झाली आहे असंही मोदी म्हणाले.

मोदींनी 1 हजार कोटींचा स्टार्टअप फंड लाँच करताना म्हटलं की आम्ही स्टार्ट अप सिस्टिम तयार करण्याचा प्रयत्न करत आहोत. ही व्यवस्था of the youth, by the youth, for the youth या मंत्रावर आहे.

हे वाचा - कोविशील्डच द्या; स्वदेशी कोव्हॅक्सिन लस घेण्यास डॉक्टरांनीच दिला नकार

मोदी म्हणाले की, स्टार्टअपच्या वेगवेगळ्या क्षेत्रात सुरु असलेली घोडदौड पाहता यात भविष्य बदलण्याची ताकद असल्याचं म्हणता येईल. देशातील स्टार्टअप कंपन्यांनी कोरोना व्हायरसच्या काळात संधी शोधल्या. स्टार्टअपने परंपरागत वाट सोडून नवा मार्ग धरला असून त्यात आता विविधता दिसत असल्याचंही मोदींनी सांगितलं.