PM Modi in Ayodhya : पंतप्रधान मोदींनी मोदींनी केलं 11 दिवसांच्या व्रताचे उद्यापन, असा सोडला उपवास.. पाहा व्हिडिओ

अयोध्येतील प्राणप्रतिष्ठा सोहळा पार पडल्यानंतर आता पंतप्रधान नरेंद्र मोदींचा उपवासही संपन्न झाला आहे. गोविंद देव गिरी महाराजांच्या हस्ते चरणामृत प्राशन करुन मोदींनी हा उपवास सोडला. प्राणप्रतिष्ठा सोहळ्याच्या निमित्ताने मोदींनी 11 दिवसांचा उपवास ठेवला होता.

पंतप्रधान नरेंद्र मोदींनी 13 जानेवारीपासून खास व्रत सुरू केलं होतं. या व्रतानुसारच पुढील 11 दिवस आपली दिनचर्या असणार असल्याचं मोदींनी घोषित केलं होतं. गोविंद देव गिरी महाराजांनी याबाबत पंतप्रधानांचं कौतुक केलं. पंतप्रधानांनी स्वतःच अनुष्ठानाची नियमावली मागितली होती. तीन दिवसांच्या उपवासाचा पर्याय असतानाही त्यांनी तब्बल 11 दिवसांचा उपवास पूर्ण केला; असंही त्यांनी म्हटलं.

यावेळी बोलताना गोविंद देव गिरी महाराज म्हणाले, की 500 वर्षांच्या प्रतिक्षेनंतर हा क्षण पहायला मिळाला आहे. राम या देशाचा आत्मविश्वास आहे. देशात अशा प्रकारचं परिवर्तन आणण्यासाठी आपलं संपूर्ण जीवन कार्य करावं लागतं. हे कार्य पीएम मोदींनी केलं आहे.

आपल्या देशाला पंतप्रधान म्हणून मोदी मिळाले, हे देशाचंच नाही तर संपूर्ण जगाचं सौभाग्य आहे. त्यांच्या मंगल हातांनी आज रामलल्लाची प्राणप्रतिष्ठा झाली आहे. हे स्वाभाविकच होतं. पूर्ण 11 दिवस पंतप्रधानांनी अनुष्ठानाचे पालन केलं हे ऐकून मला खरंच आश्चर्य वाटलं, असंही ते यावेळी म्हणाले.