लाल टोपीवाल्यांना फक्त लाल दिव्याशी देणं-घेणं : पंतप्रधान नरेंद्र मोदी

लखनऊ - पंतप्रधान नरेंद्र मोदी (PM Narendra Modi) हे उत्तर प्रदेशात असून त्यांनी जवळपास ९ हजार कोटी रुपयांच्या विकासकामांचे उद्घाटन केले. यामध्ये खताचा कारखाना, एम्स, बाबा राघव दास मेडिकल कॉलेजच्या आरएमआरसी इत्यादींचे लोकार्पण करण्यात आले. खताच्या कारखान्याचे उद्घाटन करताना मोदी म्हणाले की, आम्ही आधीच्या सरकारमधील दिवस पाहिले आहेत. तेव्हा धान्य असतानासुद्धा गरिबांना धान्य मिळत नव्हतं. आज आम्ही गरिबांसाठी धान्याची गोदामं उघडली आहेत. पीएम अन्न योजनेचा कालवधी वाढवला आहे.

पंतप्रधान नरेंद्र मोदी यांनी अखिलेश यादव यांच्यावर टीकासुद्धा केली. त्यांनी म्हटलं की, आधीच्या सरकारने गोरखपूरमध्ये एम्ससाठी जमीन देताना वेळ घालवला. खूप दबाव टाकल्यानंतर एम्ससाठी जमीन दिली गेली. कोरोनाच्या संकटातसुद्धा विकासाचं काम डबल इंजिन सरकारने थांबू दिलं नाही. लोहिया आणि जयप्रकाश नारायण यांचे संस्कार विरोधक विसरले असल्याचंही मोदी यावेळी म्हणाले.

उत्तर प्रदेशातील जनतेला माहिती आहे की लाल टोपी वाल्यांना फक्त लाल दिव्याशी देणं घेणं आहे. त्यांना फक्त सत्ता हवीय. दहशतवाद्यांना अभय देण्यात आणि त्यांना तुरुंगातून सोडवण्यासाठी सत्ता हवीय. लाल टोपीवाले यूपीसाठी धोक्याचा इशारा असल्याचंही मोदींनी म्हटलं.

आधी गोरखपूरमध्ये फक्त एक मेडिकल कॉलेज होतं. लोकांना उपचारासाठी बनारस आणि लखनऊला जावं लागत होतं. जेव्हा तुम्ही आम्हाला सेवेची संधी दिलीत तेव्हा एम्स उभा राहिलं. रिसर्च सेंटरची स्वत:ची बिल्डिंगसुद्धा तयार आहे असं मोदींनी या उद्घाटन समारंभावेळी सांगितलं.