PM Modi Speech : मित्रों, मेरे प्रिय देशवासियों ते मेरे प्यारे परिवारजनों! मोदींच्या भाषणातील बदललेल्या शब्दांमागचं रहस्य

नवी दिल्ली : पंतप्रधान नरेंद्र मोदी यांनी ७७ व्या स्वातंत्र्यदिनाच्या निमित्ताने दिल्लीतील लाल किल्ल्यावर ध्वजारोहण केले आणि देशाला संबोधित केले. यावेळी त्यांनी ८९ मिनिटांचे भाषण केले पण त्यांच्या मागच्या भाषणांची तुलना केली तर या भाषणात त्यांची वेगळीच झलक पाहायला मिळाली आहे.

"मेरे प्यारे देशवासियों..." या वाक्याने पंतप्रधान नरेंद्र मोदी आपल्या प्रत्येक भाषणाची सुरूवात करतात. पण आजच्या लाल किल्ल्यावरील भाषणात त्यांनी "मेरे प्यारे परिवारजनों..." या वाक्याचा वापर केला आहे. आपल्या दीड तासाच्या भाषणामध्ये त्यांनी अनेकदा या वाक्याचा वापर केला.

दरम्यान, २०२४ च्या लोकसभा निवडणुकांच्या आधी पंतप्रधान नरेंद्र मोदी यांनी नवी खेळी खेळली असून देशवासियों या शब्दाऐवजी परिवारजनों हा शब्द वापरला आहे. देशवासियों असाही शब्द त्यांनी या भाषणात वापरला पण लगेच परिवारजनों हा शब्द वापरून त्यांनी भाषण पूर्ण केलं. इथून पुढे होणाऱ्या सभेतील भाषणामध्ये सुद्धा ते पिरवारजनों हा शब्द वापरतील अशी शक्यता आहे.

काय आहे यामागील रहस्य?

भाषणांत वापरलेल्या त्यांच्या नवीन शब्दांची त्यांनी चांगलीच तयारी केल्याचंही त्यांच्या भाषणातून दिसून आलं. परिवारजनों या शब्दातून त्यांनी सगळा देश माझा परिवार आहे आणि मी या परिवाराचा सदस्य आहे असं सांगण्याचा प्रयत्न केला आहे.

सामान्य लोकांना भावणारा हा शब्द असल्यामुळे आपण देशातील जनतेसोबत असल्याचा संदेश त्यांनी भारतीयांना दिला असं म्हणता येईल. त्याचबरोबर मी माझ्या परिवाराच्या सुखदु:खात सहभागी असतो, परिवाराचा सदस्य बनण्याचा प्रयत्न करणाऱ्या मोदींनी विरोधकांनाही यावरून संदेश दिला आहे.