आपल्या सुधारणावादी विचारांनी परंपरावाद्यांना धक्का, पण गरीब, दुर्लक्षित आणि पीडितांना दिलासा देणारे पोप फ्रान्सिस यांनी आपल्या तेरा वर्षांच्या कालखंडात अनेक धाडसी भूमिका घेतल्या होत्या. आपल्या प्रेमळ स्वभावाने टीकाकारांच्या मनातही आदराचे स्थान निर्माण केले होते. अनावश्यक टीकेवर ‘मौन’ हेच उत्तर असल्याचे त्यांनी दाखवून दिले होते. विविध परिस्थितींमध्ये त्यांनी लोकांना केलेली आवाहने आणि व्यक्त केलेले विचार मार्गदर्शक ठरले आहेत.
