प्रणव मुखर्जी व्हेंटिलेटरवर; प्रकृतीत सुधारणा नाही

नवी दिल्ली - देशाचे माजी राष्ट्रपती प्रणव मुखर्जी यांच्या मेंदूवर सोमवारी शस्त्रक्रिया करण्यात आली. यानंतर त्यांची प्रकृती गंभीर असून व्हेंटिलेटरवर ठेवण्यात आलं आहे. प्रणव मुखर्जी यांच्यावर लष्कराच्या रुग्णालयात उपचार सुरू आहेत. दरम्यान, 84 वर्षीय मुखर्जी यांची कोरोना टेस्टही करण्यात आली होती. त्याचा अहवाल पॉझिटिव्ह आला होता. संरक्षण मंत्री राजनाथ सिंग यांनी रुग्णालयात जाऊन त्यांच्या तब्येतीची विचारपूस केली होती. 

प्रणव मुखर्जी यांच्या मेंदूमध्ये रक्ताची गाठ तयार झाली होती. त्यामुळे त्यांची शस्त्रक्रिया करण्यात आली होती. यानंतर मुखर्जींची प्रकृती गंभीर असून त्यात सुधारणा झाली नसल्याचं रुग्णालय प्रशासनाने सांगितलं आहे.
 

दरम्यान, प्रणव मुखर्जी यांनी ट्विटरवरून म्हटलं होतं की, रुग्णालयात आल्यानंतर कोरोनाची चाचणी करण्यात आली. त्याच्या अहवालात कोरोनाची लागण झाल्याचं समोर आलं होतं. गेल्या आठवड्याभरात माझ्या संपर्कात आलेल्यांनी कोरोना चाचणी करून घ्यावी असंही आवाहन त्यांनी केलं होतं. 

राष्ट्रपती रामनाथ कोविंद यांनी मुखर्जी यांची तब्येत लवकर ठीक व्हावी अशी प्रार्थना केली आहे. राष्ट्रपती कोविंद यांनी प्रणव मुखर्जी यांची मुलगी शर्मिष्ठा मुखर्जी यांच्याकडे प्रकृतीची विचारपूस केली. राष्ट्रपती रामनाथ कोविंद यांनी ट्विटरवरून याची माहिती दिली आहे. 

हे वाचा - प्रसिद्ध शायर राहत इंदौरी यांचे कोरोनामुळे निधन

काँग्रेसचे दिग्गज नेते असलेले प्रणव मुखर्जी यांनी 2012 ते 2017 या काळात देशाचे राष्ट्रपतीपद भूषवले होते. 2019 मध्ये त्यांना भारतरत्न पुरस्काराने सन्मानित करण्यात आले होते. युपीए सरकारच्या काळात प्रणव मुखर्जी यांनी देशाचं अर्थ खातंही सांभाळलं होतं.