आम्ही 'इंडिया' आहोत याचा अभिमान, तुम्ही...: पृथ्वीराज चव्हाण यांचे मोदींच्या टीकेला प्रत्युत्तर

मुंबई - विरोधी पक्षांनी केंद्रातील भाजप सरकारशी दोन हात करण्यासाठी नव्या आघाडीची घोषणा केली आहे. या आघाडीत २६ पक्ष सामील झाले असून या आघाडीला इंडिया इंडियन नॅशनल डेव्हलपमेंट इन्क्लुझिव्ह अलायंस) असे नाव देण्यात आले आहे. यावरून पंतप्रधान नरेंद्र मोदी यांनी जोरदार टीका केली होती. त्याला काँग्रेसनेते आणि माजी मुख्यमंत्री पृथ्वीराज चव्हाण यांनी प्रत्युत्तर दिलं आहे.

पृथ्वीराज चव्हाण म्हणाले की, पंतप्रधान नरेंद्र मोदी नावावरुन चर्चा करणं हास्यास्पद आहे. आता लढाई विचारांची आहे. विचारांची लढाई आहे तर विचारांवर बोला. मात्र त्यावर बोलायची तुमची हिम्मत नाही. शिवाय मणिपूरच्या घटनेवर बोलायची पंतप्रधान नरेंद्र मोदी यांची हिम्मत नाही, असंही चव्हाण म्हणाले.

दरम्यान मोदींनी इंडिया नावावरून केलेल्या टीकेवर चव्हाण म्हणाले की, आम्ही इंडिया आहोत याचा आम्हाला अभिमान आहे. मोदींनी इंडिया नावावरून कुरापत केली तरी त्याचा उपयोग होणार नाही.

पंतप्रधान नरेंद्र मोदींनी इंडियावर टीका करताना म्हटलं होतं की, केवळ इंडिया हे नाव ठेवल्याने काही होत नाही. ईस्ट इंडिया कंपनीमध्येही इंडिया होते. इंडियन मुजाहिद्दिनच्या नावातही इंडिया आहे.