पंजाब: मंत्रिमंडळात सहा नवे चेहरे; विस्तारात १५ जणांचा समावेश

चंडीगड : पंजाबमधील चरणजितसिंग चन्नी मंत्रिमंडळाचा आज विस्तार करण्यात आला. त्यात सहा नव्या चेहऱ्यांसह १५ जणांचा समावेश करण्यात आला. पंजाबमध्ये पुढील वर्षी विधानसभा निवडणूक होत आहे. त्यापूर्वी काही महिने आधीच काँग्रेसने कॅप्टन अमरिंदरसिंग यांना पदावरून हटवून चरणजितसिंग चन्नी यांच्याकडे मुख्यमंत्रिपदाची सूत्रे सोपविली होती.

निवडणुका डोळ्यासमोर ठेवून रणदीपसिंग नभा, राजकुमार वेर्का, संगीतसिंग गिलझियान, परगट सिंग, अमरिंदरसिंग राजा वारंग आणि गुकरिरतसिंग कोटली या सहा नव्या चेहऱ्यांचा समावेश मंत्रिमंडळात करण्यात आला आहे. याशिवाय ब्रह्म मोहिंद्रा, मनप्रीतसिंग बादल, त्रिपत राजिंदरसिंग बाजवा, सुखबिंदरसिंग सरकारिया, राणा गुरजितसिंग, अरुणा चौधरी, रझिया सुल्ताना, भारत भूषण आशू व विजय इंदर सिंगला यांचा समावेश आहे.

मोहिंद्रा हे मंत्रिमंडळातील सर्वांत ज्येष्ठ सदस्य आहेत. अमरिंदरसिंग यांच्या मंत्रिमंडळातही ते मंत्री होते. कोटली हे माजी मुख्यमंत्री बेअंतसिंग यांचे नातू आहेत. त्यांच्यावर अपहरणाचा खटला चालला होता, त्यातून त्यांची सुटका झाली होती. त्यामुळे त्यांच्या मंत्रिमंडळातील समावेशाला शिरोमणी अकाली दल आणि आम आदमी पार्टीने विरोध केला होता.
राणा गुरजितसिंग यांचा समावेश अमरिंदरसिंग यांच्या मंत्रिमंडळात होता. मात्र वाळू गैरव्यवहारात आरोप झाल्याने त्यांना मंत्रिमंडळातून वगळण्यात आले होते. ते पंजाबच्या श्रीमंत आमदारांपैकी एक आहेत.