भटक्या कुत्र्याने शोधून काढला मालकाचा शीर नसलेला मृतदेह

मोहाली: कुत्रा हा इमानी प्राणी आहे. कुत्रा नेहमी मालकाशी इमान राखतो. पंजाबमध्ये एका भटक्या कुत्र्याने मालकाचा शीर नसलेला मृतदेह शोधून काढला आहे. छोटी बडी नागल गावात राहणाऱ्या सुचा सिंग यांनी दोन वर्षांपूर्वी एका भटक्या कुत्र्याची काळजी घ्यायला सुरुवात केली. त्याला घरात आसरा दिला. त्याच भटक्या कुत्र्याने सुचा सिंग यांचा हत्येनंतर पुरलेला शीर नसलेला मृतदेह शोधून काढला. (Punjab Stray dog adopted by victim found his buried headless body)

पंजाबचे मुख्यमंत्री अमरिंदर सिंह यांच्या मोहालीतील सिसवान येथील फार्महाऊस जवळ सुचा सिंह यांचे धड सापडले. सुचा सिंग यांना कुटुंबियांनी रविवारी शोधण्याचा प्रयत्न केला. त्यावेळी 'रॉकी' नावाच्या भटक्या कुत्र्याने सुचा सिंग यांचा मृतदेह पुरला होता, ती जागा दाखवली. सुचा सिंग यांचे शीर अद्याप सापडलेले नाही. त्यांची हत्या झाली आहे. या हत्या प्रकरणात तिघांविरोधात गुन्हा नोंदवण्यात आला आहे. दोघांना अटक करण्यात आली असून एक आरोपी फरार आहे.

छोटी बडी नागल गावात मंगळवारी सुचा सिंग यांच्यावर अंत्यसंस्कार करण्यात आले. "रॉकी रविवारपासून काही खातपीत नाहीय. आम्ही त्याला सोडलं, तर तो वडिलांचा मृतदेह जिथे सापडला त्या जागेवर जाऊन सारखा घुटमळतो" असे सुचा सिंग यांचा मुलगा संदीप सिंगने सांगितले.

"दोन वर्षांपूर्वी रॉकीची हालत खूप खराब होती. उपासमारीमुळे त्याच्यात त्राण नव्हते. त्यावेळी सुचा यांनी त्याची काळजी घ्यायला सुरुवात केली. त्याला खाऊपिऊ घातले. रॉकी आणि सुचा दोघांना एकमेकांचा असा लळा लागला की, सुचा कधी घरी येणार त्याची रॉकी वाट पाहायचा" असे भाग सिंह यांनी सांगितले. ते सुचा सिंग यांचे चुलत भाऊ आहेत. सुचा यांची हत्या करण्यापूर्वी त्यांनी मित्रांसोबत पार्टी केली. त्यावेळी रॉकी सुद्धा त्यांच्यासोबत होता. सुचा यांच्याशोधात कुटुंबीय आणि गावकरी घटनास्थळी पोहोचले. त्यावेळी रॉकीच्या गळ्यातील पट्टा संदीपच्या हातात होता. त्याने संदीपकडून स्वत:ची सुटका करुन घेतली व धावत एकाठिकाणी जाऊन खोदकाम सुरु केले. रॉकी काहीतरी सांगण्याचा प्रयत्न करतोय, हे गावकऱ्यांच्या लक्षात आले. हे खोदकाम सुरु असताना तिथे सुचा यांचा शीर नसलेला मृतदेह आढळला.