राजीव यांनी आधुनिक भारताचा पाया रचला

नवी दिल्ली : देशाचे माजी पंतप्रधान राजीव गांधी यांच्या ७७ व्या जयंतीनिमित्त काँग्रेससह पंतप्रधान नरेंद्र मोदी, संरक्षणमंत्री राजनाथसिंह यांनी त्यांना आदरांजली वाहिली. काँग्रेस नेते राहुल गांधी यांनी वीरभूमीवरील राजीव गांधी यांच्या समाधिस्थळी आपल्या वडिलांना आदरांजली अर्पण केली. राजीव गांधी प्रचंड दूरदृष्टीचे नेतृत्व होते. त्यांच्या दूरदर्शी धोरणांमुळे आधुनिक भारताचा पाया रचला गेला. ते दयाळू व प्रेमळ होते. ते सदैव माझ्या हृदयात राहतील, अशी पोस्ट राहुल गांधी यांनी फेसबुकवर टाकली. (Politics News)

काँग्रेस अध्यक्ष सोनिया गांधी यांनी संसद भवनात राजीव गांधी यांना आदरांजली वाहिली. प्रियांका गांधी यांनी राजीव गांधी यांच्यासोबतचे आपले छायाचित्र सोशल मीडियावर शेअर केले. ते अन्याय सहन करत नसत. ते काय योग्य व अयोग्य याबद्दल बोलत असत. खंबीरपणे उभा राहत त्यांनी कपटाने काळवंडलेल्या आकाशात सत्याचा प्रकाश पसरविला, अशा शब्दांत त्यांनी आपल्या भावना व्यक्त केल्या.

माहिती-तंत्रज्ञानातील योगदानाची दखल

पंतप्रधान नरेंद्र मोदी यांनी ट्विटरवरून राजीव गांधी यांना श्रद्धांजली अर्पण केली. माजी पंतप्रधान राजीव गांधी यांना जयंतीनिमित्त आदरांजली, असे ट्विट त्यांनी केले. उपराष्ट्रपती वेंकय्या नायडू, संरक्षणमंत्री राजनाथसिंह यांनीही राजीव गांधी यांच्या माहिती-तंत्रज्ञान, शिक्षणातील योगदानाला उजाळा दिला.