Ram Mandir Ayodhya: "नियतीने ठरवलं होतं की..."; राम मंदिर अभिषेक अन् PM मोदींवर काय म्हणाले लालकृष्ण अडवाणी?

Ram Mandir Ayodhya: भाजपचे ज्येष्ठ नेते आणि माजी उपपंतप्रधान लालकृष्ण अडवाणी 22 जानेवारी रोजी राम मंदिरात राम लल्लाच्या अभिषेक सोहळ्याला उपस्थित राहणार आहेत. विश्व हिंदू परिषदेचे आंतरराष्ट्रीय कार्याध्यक्ष आलोक कुमार यांनी याला दुजोरा दिला होता. लालकृष्ण अडवाणी 22 जानेवारीला अयोध्येत असतील आणि कार्यक्रमात सहभागी होतील.

आरएसएसचे नेते कृष्ण गोपाल, राम लाल आणि आलोक कुमार बुधवारी अडवाणी यांच्या घरी गेले होते. राम मंदिराच्या उद्घाटन सोहळ्यासाठी त्यांना आमंत्रित केले. अयोध्येतील समारंभात लालकृष्ण अडवाणींना आवश्यक त्या सर्व वैद्यकीय सुविधा पुरविल्या जातील. दरम्यान लालकृष्ण अडवाणी यांची प्रतिक्रिया समोर आली आहे.

लालकृष्ण अडवाणी म्हणाले, "नियतीने ठरवले होते की अयोध्येत श्री रामाचे मंदिर निश्चितच बांधले जाईल." हा क्षण आणल्याबद्दल आणि रामलल्लाचे भव्य मंदिर उभारून त्याचा संकल्प पूर्ण केल्याबद्दल अडवाणींनी पंतप्रधान नरेंद्र मोदी यांचेही अभिनंदन केले आहे."

आपल्या रथयात्रेतील अविस्मरणीय क्षणांचे स्मरण करून अडवाणी म्हणाले की, "रथयात्रेला जवळपास 33 वर्षे झाली आहेत. 25 सप्टेंबर 1990 रोजी सकाळी रथयात्रेला सुरुवात करताना आपल्याला माहित नव्हते की आपण ज्या प्रभू रामावरील श्रद्धा ठेवून ही यात्रा सुरू करत आहोत ती देशात चळवळीचे रूप घेईल." (Ram Mandir Ayodhya)