अकरा मुलींच्या खूनप्रकरणी सर्वोच्च न्यायालयाची सीबीआयला नोटीस

नवी दिल्ली ः बिहारमधील मुझफ्फरपूर येथील मुलींच्या निवारागृहातील अकरा मुलींच्या खूनप्रकरणी चौकशीच्या सद्यःस्थितीचा अहवाल तीन जूनपर्यंत सादर करण्याचा आदेश सर्वोच्च न्यायालयाने आज केंद्रीय अन्वेषण विभागाला (सीबीआय) दिला.

सरन्यायाधीश रंजन गोगोई यांच्या अध्यक्षतेखालील खंडपीठासमोर आज या प्रकरणाची सुनावणी झाली. या प्रकरणाचे गांभीर्य ध्यानात घेता तीन जून रोजी न्यायालयाच्या सुटीकालीन खंडपीठासमोर सुनावणी घेण्यात येईल, असे स्पष्ट करण्यात आले.

तीन जूनपर्यंत या प्रकरणाचा तपास पूर्ण करणे सीबीआयला अशक्‍य आहे. बिहारमधील मुझफ्फरपूर येथील मुलींच्या निवारागृहातील 11 मुलींचा खून झाल्याची शक्‍यता वर्तविण्यात येत आहे.

मृतदेह पुरलेल्या ठिकाणी सीबीआयला मानवी हाडे आढळून आल्याची माहिती ऍटर्नी जनरल के. के. वेणुगोपाल यांनी न्यायालयाला दिली. या प्रकरणातील मुख्य आरोपी ब्रिजेश ठाकूर याने सहकाऱ्यांच्या मदतीने 11 मुलांचा खून केला असल्याचा खळबळजनक दावा तीन मे रोजी सीबीआयकडून न्यायालयात करण्यात आला होता. या निवारागृहातील मुलींचा लैंगिक छळ करून त्यांच्यावर बलात्कार करण्यात आल्याची माहिती टाटा समाजविज्ञान संस्थेच्या (टीआयएसएस) अहवालातून पुढे आली होती. त्यानंतर हे प्रकरण उजेडात आले होते.