Video: फी न भरल्याने 'तिला' परीक्षेला बसू दिलं नाही; भाजपच्या 'या' नेत्याने...

उन्नावः शाळेची फी भरली नाही म्हणून एका विद्यार्थीनीला परीक्षेला बसू न दिल्याचा धक्कादायक प्रकार घडला आहे. खासदार वरुण गांधी यांनी व्हीडिओ शेअर करीत माणुसकीला विसरु नका, असं आवाहन केलंय.

उत्तर प्रदेशातल्या उन्नाव जिल्ह्यात ही घटना घडली आहे. वरुण गांधी यांनी मंगळवारी ट्विटरवर एक व्हीडिओ शेअर केला. ज्यामध्ये एक मुलगी रडत रडत फी न भरल्यामुळे शाळेने परीक्षेला बसू न दिल्याची तक्रार केली आहे.

या व्हीडिओसोबत वरुण गांधी यांनी, ''या मुलीचे अश्रू त्या लाखो मुलांच्या यातना आहेत ज्यांना फी नसल्यामुळे अवहेलना सहन करावी लागली. आर्थिक संकटामुळे विद्यार्थ्यांच्या शिक्षणात बाधा येऊ नये, याची जिल्ह्यातील अधिकारी आणि लोकप्रतिनिधींची जबाबदारी आहे. खाजगी संस्थांनी मानवता विसरु नये, शिक्षण हा व्यवसाय नाही'' असं ट्विटमध्ये म्हटलं आहे.

माहितीनुसार, हा व्हीडिओ उन्नावच्या बांगरमऊजवळ टोला नावाचं एक छोटं शहर आहे, तिथला आहे. या व्हीडिओमध्ये विद्यार्थीनीला गेटबाहेर उभं केल्यामुळे ती ढसाढसा रडू लागली. सहावीत शिकणारी अपूर्वा सिंह हिने सांगितलं की, आज माझे वडील पैसे घेऊन येणार आहेत. तरीही मला शाळेबाहेर काढलं. तिचा हा व्हीडिओ व्हायरल होत आहे. विशेष म्हणजे तिच्यासोबत आणखी मुलांनाही परीक्षेपासून वंचित ठेवण्यात आलेलं आहे.