सात ते १२ वयोगटातील मुलांना दिल्या जाणाऱ्या कोव्होवॅक्स लसीला मंजुरी

नवी दिल्ली : भारतीय औषध महानियंत्रकांनी (डीसीजीआय) ७ ते १२ वर्षांच्या मुलांसाठी सीरम इन्स्टिट्यूट ऑफ इंडियाच्या कोव्होवॅक्स लसीला मंजुरी दिली आहे. यापूर्वी केंद्रीय औषधी प्राधिकरणाच्या एका तज्ज्ञ समितीने सात ते १२ वयोगटातील मुलांसाठी कोव्होवॅक्स लसीला (Covovax Vaccine) आपात्कालीन उपयोगासाठी मंजुरी देण्याची शिफारस शुक्रवारी केली होती. मात्र आता डीसीजीआयने त्यास मंजुरी दिली आहे. (Serum Institute Of India's Covovax Vaccine For Children Age 7 To 12 Years By DCGI Approves)

एएनआय वृत्तसंस्थेने सूत्रांचा हवाला देत म्हटले आहे, की कोव्होवॅक्सला केवळ आपात्कालीन स्थितीत मर्यादित वापरासाठी मंजुरी दिली गेली आहे. सीरम इन्स्टिट्यूट ऑफ इंडियाच्या (Serum Institute Of India) सरकारी आणि नियामक विभागाचे संचालक प्रकाश कुमार सिंह यांनी १६ मार्च रोजी आपात्कालीन उपयोग प्राधिकरणसाठी अर्ज सादर केला होता. यापूर्वी डीसीजीआयने २८ डिसेंबर रोजी प्रौढ नागरिकांना आपात्कालीन स्थितीत मर्यादित वापरासाठी कोव्होवॅक्सला मजुरी दिली होती.

नऊ मार्च रोजी १२-१४ वयोगटातील मुलांच्या लसीकरणास सुरुवात करण्यात आली होती. दुसरीकडे देशभरात कोरोना लसीकरण अभियान गेल्या वर्षी १६ जानेवारीपासून सुरुवात झाली होती. त्यात आरोग्य कर्मचाऱ्यांना पहिल्या टप्प्यात लस दिली गेली होती.