दोन तृतीयांश 18+ लोकसंख्येला पहिला डोस; तर 'या' राज्यांमध्ये संपूर्ण लसीकरण

नवी दिल्ली : भारतातील 18+ लोकसंख्येपैकी 66 टक्के लोकसंख्येने कोरोनाचा कमीतकमी एक डोस घेतला आहे. तर 23 टक्के 18 + लोकसंख्येने दोन्ही डोस घेतले आहेत. काही राज्यांनी केलेल्या प्रचंड कामामुळे आपण हे साध्य करू शकलो आहोत, अशी माहिती केंद्रीय आरोग्य सचिव राजेश भूषण यांनी दिली आहे.

पुढे ते म्हणाले की, गेल्या 24 तासांमध्ये, कोरोनाची 31,000 प्रकरणे नोंदवली गेली आहेत आणि यातील बहुतेक प्रकरणे केरळ आणि महाराष्ट्रातून नोंदवली गेली आहेत. मात्र, ही संख्या कमी होत आहे. गेल्या आठवड्यात एकूण रुग्णांपैकी 62.73% प्रकरणे केरळमधून नोंदवली गेली आहेत.

सलग 12 व्या आठवड्यामध्ये, विकली पॉझिटीव्हीटी रेट कमी होताना दिसत आहे तो 3% पेक्षा कमी आहे. सध्या भारतातील रिकव्हरी रेट हा 97.8% आहे.

देशातील सहा राज्ये अथवा केंद्रशासित प्रदेशांनी त्यांच्या एकूण लोकसंख्येला पहिल्या डोस हा 100% दिला आहे. यामध्ये लक्षद्वीप, चंदीगड, गोवा, हिमाचल प्रदेश, अंदमान आणि निकोबार बेटे आणि सिक्कीम आहेत, अशी माहिती त्यांनी दिली आहे.

पुढे त्यांनी दिलेल्या माहितीनुसार, चार राज्ये आणि केंद्रशासित प्रदेशांनी 90 टक्क्यांहून अधिक लोकसंख्येला पहिला डोस दिला आहे. यामध्ये दादरा नगर हवेली, केरळ, लडाख आणि उत्तराखंड या राज्यांचा समावेस आहे.