सुटीसाठी परतणारे जवान वाटेतूनच पुन्हा कर्तव्यावर!

बेळगाव : भारताने पाकिस्तानवर केलेल्या एअर स्ट्राइकमुळे सीमेवरील स्थिती नाजूक असून, जवानांच्या रजा रद्द केल्या जात आहेत. चारच दिवसांपूर्वी लग्नाच्या बोहल्यावर चढलेल्या मलिकवाड येथील जवान राजेंद्र सुतार यांना सैन्याने रजा रद्द करून सेवेत हजर होण्याचा संदेश दिला होता. ही घटना ताजी असतानाच, आता सुटीवर येणाऱ्या एकाच कुटुंबातील दोघा भावंडांना अर्ध्या रस्त्यातूनच माघारी सेवेवर रुजू होण्याचे आदेश आले. दोन्ही जवान अथणी तालुक्‍यातील किरणगी येथील आहेत.

पाकिस्तानवरील हल्ल्यामुळे सीमेवर तणाव आहे. या पार्श्‍वभूमीवर रजा घेऊन घरी आलेल्या जवानांना त्वरित सेवेत हजर होण्याचे आदेश आले आहेत. सुटी घेऊन घराकडे परतणाऱ्या एकाच कुटुंबातील दोघा लष्करी भावंडांनाही घरी पोचण्याआधीच सीमेवर तैनातीसाठी माघारी परतावे लागल्याचा प्रसंग घडला.

किरणगीमधील माजी सैनिक सदाशिव लोहार यांना तीन मुले असून, पैकी दोघेजण भारतीय सैन्यात सेवा बजावत आहेत. माजी सैनिक सदाशिव यांनी लष्करात 34 वर्षे सेवा बजावली असून 1965, 71 व 99 च्या कारगील युद्धात सहभाग घेतला होता. त्यांचा मुलगा संतोष हा सध्या जम्मू-काश्‍मीर सीमेवर तैनात असून, दुसरा मुलगा अशोकचीही राजस्थान येथून नुकतीच काश्‍मीरमध्ये नियुक्ती केली आहे.

दोघाही भावंडांनी एकाचवेळी रजा घेतली होती. दोघेही रेल्वेने गावाकडे येत असताना त्यांची रजा रद्द केल्याचे संदेश त्यांना मोबाईलवर आले. वडिलांनीही त्यांना फोन करून रजा रद्द झाल्याची माहिती दिली. त्यामुळे या दोन्ही भावंडांना घरी पोचून कुटुंबाची भेट घेण्याआधीच अर्ध्या रस्त्यातूनच देशसेवेसाठी माघारी फिरण्याची वेळ आली.