चर्चे पे चर्चा कायम; भारत-चिनी अधिकाऱ्यांत होणार बोलणी 

नवी दिल्ली - पूर्व लडाखच्या पॅंगॉंग त्सो भागातील लष्करी तणाव संपुष्टात यावा म्हणून भारत आणि चीनच्या लष्करी अधिकाऱ्यांमध्ये पुढील आठवड्यात पुन्हा बोलणी होणार आहे. या बोलणीमध्ये लष्कर माघारी बोलाविण्याबाबत उभय देशांत काही प्राथमिकता निश्चित केल्या जाऊ शकतात अशी माहिती सूत्रांनी दिली. आतापर्यंत दोन्ही देशांच्या लष्करी अधिकाऱ्यांमध्ये चर्चेच्या चार फेऱ्या पार पडल्या आहेत. 

ताज्या बातम्यांसाठी डाऊनलोड करा ई-सकाळचे ऍप 

लष्करी आणि राजनैतिक मार्गाने आतापर्यंत झालेल्या चर्चेची फलनिष्पत्ती ही आहे की दोन्ही देशांच्या लष्कराने पूर्व लडाखमधील चौकी क्रः १४, १५ आणि १७(अ) या भागांतून पूर्णपणे माघार घेतलेली दिसून येते. चीनचे लष्कर पँगॉंग त्सो या भागातून माघारी जावे म्हणून भारताचे प्रयत्न सुरु आहेत. सध्या चीनने गलवान खोऱ्यातील काही चौक्यांपासून माघार घेतली असली तरीसुध्दा पॅंगॉंग त्सो भागातील फिंगर क्रः ५ आणि फिंगर क्रः ८ येथे मात्र चिनी सैन्य ठाण मांडून बसले असून ते आताच माघार घेण्याची शक्यता तशी कमीच आहे. दोन्ही देशांच्या परराष्ट्र मंत्रालयाने हा तणाव निवळावा म्हणून पुढाकार घेतल्याचे दिसून येते. दोन्ही देशांत पार पडलेल्या चर्चेच्या सर्व फेऱ्यांमध्ये भारताने चीनला माघार घ्यावे म्हणून ठणकावले आहे. 

पुण्याच्या बातम्या वाचण्यासाठी येथे क्लिक करा

आता हिमाचलमुळे चिंता 
चीनने आता हिमाचल प्रदेशला लागून असणाऱ्या सीमेलगत पक्क्या रस्त्यांची उभारणी सुरु केल्याने भारताच्या चिंता वाढल्या आहेत. मागील दोन महिन्यांच्या काळामध्ये चीनने या भागात २० किलोमीटरपर्यंतच्या रस्त्यांची उभारणी केल्याचे निदर्शनास आले आहे. मोरंग घाटी परिसरामध्ये आता चीनचे ड्रोन देखील घिरट्या घालू लागल्याने स्थानिकांमध्ये भीतीचे वातावरण निर्माण झाले आहे.