मोटारीतून गोवर्धन परिक्रमेस तेजप्रतापना मनाई

नवी दिल्ली/मथुरा : पिता लालूप्रसाद यादव लवकर बरे व्हावे म्हणून मथुरेतील गोवर्धन पर्वताची परिक्रमा मोटारीतून करण्याचा धाकटे पुत्र तेजप्रताप यांचा संकल्प पूर्ण होऊ शकला नाही. मंदिर परिसरात वाहन आणण्यास मनाई असल्यामुळे त्यांना रोखण्यात आले. तेजप्रताप मंगळवारी मथुरेत आले होते. त्यांना गिरिराज महाराज मंदिराला मोटारीतून प्रदक्षिणा घालायची होती. त्यांची ही चमत्कारिक विनंती मंदिर व्यवस्थापन समितीच्या पदाधिकाऱ्यांनी फेटाळली. गुरुपौर्णिमेमुळे भाविकांची प्रचंड गर्दी असल्याचेही त्यांना सांगण्यात आले.

बॅरीकेडपाशी त्यांची मोटार पोलिसांनी थांबवली. त्यामुळे तेजप्रताप संतापले. त्यांनी या प्रसंगाची चित्रफीत सोशल मिडीयावर पोस्ट केली. उत्तर प्रदेश पोलिस आपल्याला रोखत असल्याचा आरोप त्यांनी केला. त्यानंतर ते जवळच्या पोलिस चौकीत गेले. मोटारीतून मंदिर परिसरात प्रवेश करण्याची औपचारिक परवानगी मिळविण्याचा त्यांचा प्रयत्न होता, मात्र चौकी अधिकाऱ्यानेही त्यांची विनंती नाकारली. गोवर्धनचे मंडळ अधिकारी गौरव त्रिपाठी यांनी सांगितले की, आम्ही केवळ आणीबाणीच्या कारणासाठी येणाऱ्या वाहनांना प्रवेशाची परवानगी देत आहोत. ज्यांना परिक्रमा करायची आहे त्यांना ती केवळ पायी करण्याची परवानगी आहे.

रुग्णालयात गीतापाठास मनाई

लालूप्रसाद यांच्यावर दिल्लीतील एम्स रुग्णालयात उपचार सुरु आहेत. तेथे गीतापाठ करण्यास तसेच ऐकण्यास मनाई केल्याचा आरोप तेजप्रताप यांनी केला होता. त्यांनी याबाबत ट्विट केले आहे. वडिलांना गीतापाठ म्हणण्याची आणि ऐकण्याची खूप आवड आहे, मात्र त्या अज्ञानी व्यक्तीला हे माहीत नाही की या महापापाची किंमत त्याला याच जन्मात चुकवावी लागेल, असे तेजप्रताप यांनी नमूद केले होते. त्यांनी गीतापाठ करण्याचे गीता ही संपूर्ण मानवजातीच्या उद्धारासाठी असून कोणत्याही वर्णाची व्यक्ती कोणत्याही देशात श्रद्धापूर्वक गीतापाठ करून परमोच्च सिद्धी प्राप्त करू शकते. कल्याणाची इच्छा बाळगलेल्या व्यक्तीने गीता वाचावी आणि दुसऱ्यांना शिकवावी. हाच कल्याणकारी मार्ग आहे, असेही त्यांनी ट्विटमध्ये नमूद केले आहे.