Karnataka NIA : बंगळुरात तब्बल 10 हजार बांगलादेशी बेकायदेशीर स्थायिक; NIA च्या तपासात धक्कादायक माहिती समोर

बंगळूर : बंगळूरसह विविध ठिकाणी १० हजारांहून अधिक बांगलादेशी (Bangladeshi) स्थलांतरित बेकायदेशीरपणे स्थायिक झाल्याची धक्कादायक बाब राष्ट्रीय तपास संस्थेच्या (NIA) अधिकाऱ्यांनी केलेल्या तपासाच्या पार्श्वभूमीवर समोर आली आहे.

अलीकडेच बांगलादेशी स्थलांतरितांना बेकायदेशीरपणे शहरात आणणाऱ्या ११ जणांना अटक करून त्यांची चौकशी एनआयए अधिकाऱ्यांनी केली. त्यावेळी असे आढळून आले की, १० हजारांहून अधिक स्थलांतरित बांगलादेशी बंगळूरसह विविध ठिकाणी बेकायदेशीरपणे येऊन स्थायिक झाले आहेत.

त्यानंतर एनआयएने स्थानिक पोलिसांच्या मदतीने तपास अधिक तीव्र केला आहे. दोन दिवसांपूर्वी एनआयए अधिकाऱ्यांनी बंगळूर आणि त्याच्या बाहेरील भागात राहणाऱ्या बांगलादेशी स्थलांतरितांवर छापे टाकले आणि त्यांना बेकायदेशीरपणे शहरात आणणाऱ्या ११ लोकांना अटक केली. आतापर्यंतच्या तपासादरम्यान दहा हजारांहून अधिक लोक बेकायदेशीररीत्या आल्याचे समोर आले आहे.

अटक करण्यात आलेल्या चौकशीत मास्टरमाईंड झाकीर हुसेन यानेच ही माहिती दिली आहे. त्यांच्या सूचनेनुसार त्यांना अनधिकृतपणे शहरात आणले जात असल्याचे त्यांनी सांगितले. दरम्यान, एनआयएच्या छाप्यादरम्यान आरोपी झाकीर हुसेन फरार झाला असून त्याला पकडण्यासाठी तपास तीव्र केला आहे.

४४ ठिकाणी छापेमारी

तीन दिवसांपूर्वी एनआयए अधिकाऱ्यांनी कर्नाटकसह १० राज्यांत ४४ ठिकाणी छापे टाकून अटक केलेल्यांकडून मोबाईल, सीमकार्ड, पेन ड्राईव्ह, कागदपत्रे, आधारकार्ड आणि रोख रक्कम जप्त केली. त्याने बनावट आधारकार्ड बनवून वेगवेगळ्या ठिकाणी वास्तव्य केल्याचे निष्पन्न झाले. शहरातील सोलादेवनहळ्ळी, केआरपूर, बेळंदूर, बैयप्पनहळ्ळी, दोड्डाबळ्ळापूर, होस्कोटे, आनेकल यासह १५ ठिकाणी हा छापा टाकला.

आधारकार्ड सापडले

एनआयएच्या छाप्यात बहुतांश बेकायदेशीर बांगलादेशी नागरिकांकडे आधारकार्ड आणि मतदार ओळखपत्र सापडले. त्यामुळे हे ओळखपत्र कोणी बनवले आणि त्यामागे कोणाचा हात आहे, याचा शोध एनआयए घेत आहे.

दरोडा आणि लुटमारीचा कट

आरोपींनी बांगलादेशी स्थलांतरितांना बेकायदेशीरपणे आणून दरोडा टाकण्याचा कट रचल्याचा संशय आहे. काहींना दरोडा टाकण्याचे प्रशिक्षणही दिल्याचे सांगण्यात येते. काही महिलांना वेश्याव्यवसायात आणण्याचाही डाव होता. या संदर्भात केवळ आरोपींच्या प्लॅनबद्दल बोलत नसून, त्यामागे असलेल्यांची नावे समोर येत असून, तपासाला गती देण्यात आल्याचे सांगण्यात येत आहे.