डोलो-650 ची विक्री वाढविण्यासाठी डॉक्टरांना दिले एक हजार कोटी; CBDT चा आरोप

नवी दिल्ली - कोरोनाच्या कालावधीत ताप कमी करण्यासाठी सर्वांच्या तोडांत डोलो-650 या गोळ्यांचं नाव होतं. ही गोळी सर्वांनाच ठावूक झाली होती.आता ही ब्रँड बनवणाऱ्या कंपनीबाबत मोठा खुलासा झाला आहे. काही दिवसांपूर्वीच डोलो 650 निर्माती कंपनीवर धाड पडली होती. (Dolo 650 news in marathi)

सेंट्रल बोर्ड ऑफ डायरेक्ट टॅक्सेस (CBDT) ने डोलो-650 औषध निर्मात्यावर डॉक्टर आणि वैद्यकीय व्यावसायिकांना डोलो-650ची विक्री वाढविण्याच्या मोबदल्यात सुमारे एक हजार कोटी रुपयांच्या मोफत भेटवस्तू दिल्याचा आरोप केला आहे. 6 जुलै रोजी नऊ राज्यांमधील बेंगळुरूस्थित मायक्रो लॅब्स लिमिटेडच्या 36 ठिकाणी छापे टाकल्यानंतर आयकर विभागाने हा दावा केला आहे.

एका निवेदनात, सीबीडीटीने सांगितले की, औषध निर्मात्यावर कारवाई केल्यानंतर विभागाने 1.20 कोटी रुपयांची रोख रक्कम आणि 1.40 कोटी रुपयांचे सोने आणि हिऱ्यांचे दागिने जप्त केले आहेत. या संदर्भात मायक्रो लॅबला पाठवलेल्या ई-मेलला कंपनीने अद्याप प्रतिसाद दिलेला नाही. सीबीडीटीने म्हटले की, शोध मोहिमेदरम्यान, कागदपत्रे आणि डिजिटल डेटाच्या स्वरूपात महत्त्वपूर्ण पुरावे सापडले असून ते जप्त करण्यात आले आहेत.