Omicron : 1 जानेवारीपासून राष्ट्रपती भवन सर्वसामान्यांसाठी बंद

नवी दिल्ली : कोरोनाचा नवा व्हेरिएंट ओमिक्रॉनच्या वाढत्या रूग्णसंख्या पाहता राष्ट्रपती भवन आणि राष्ट्रपती भवन संग्रहालय 1 जानेवारीपासून सर्वसामान्यांसाठी बंद करण्याचा निर्णय घेण्यात आला आहे. तसेच पुढील सूचनेपर्यंत गार्ड ऑफ चेंज सोहळा देखील होणार नाही, अशी माहिती राष्ट्रपती भवनाने जारी केलेल्या निवेदनात देण्यात आली आहे. देशात कोरोनाचे रूग्ण झपाट्याने वाढत असताना राष्ट्रपती भवनाने हा निर्णय घेतला आहे.

भारतातील ओमिक्रॉन रूग्णांच्या संख्येन 1200 शे चा टप्पा ओलांडला असून कोरोना विषाणूचा हा अत्यंत संसर्गजन्य व्हेरिएंट असून देशभरात त्याचा वेगाने प्रसार होत आहे. आरोग्य मंत्रालयाने दिलेल्या माहितीनुसार आतापर्यंत 23 राज्ये आणि केंद्रशासित प्रदेशांमधून ओमिक्रॉनची 1,270 प्रकरणे नोंदवली गेली आहेत, त्यापैकी 374 रुग्णांना डिस्चार्ज देण्यात आला आहे. महाराष्ट्र आणि दिल्लीमध्ये ओमिक्रॉनची सर्वाधिक प्रकरणे आहेत. भारतातील कोरोना व्हायरस रूग्णांची दैनंदिन संख्या सलग तिसऱ्या दिवशी 15,000 च्या वर नोंदविण्यात आली आहे.