Kiran Plane : प्रशिक्षणार्थी ‘किरण’ विमानामध्ये तांत्रिक दोष निर्माण झाल्याने बंगळूरजवळ कोसळले

बंगळूर : एचएएल येथून प्रशिक्षणासाठी निघालेल्या हवाई दलाच्या ‘किरण’ या विमानामध्ये तांत्रिक दोष निर्माण झाल्याने ते गुरुवारी चामराजनगरनजीकच्या बोगापूर येथे कोसळले. विमान कोसळताच त्याला आग लागली. तेजपाल व भूमिका हे दोघे वैमानिक अपघातातून बचावले.

बंगळूरच्या एचएएल विमानतळावरून अाज दुपारी साडेबाराच्या सुमारास चामराजनगरमार्गे प्रशिक्षणासाठी उड्डाण केलेल्या हवाई दलाच्या विमानातील इंजिनामध्ये तांत्रिक दोष निर्माण झाला. त्यानंतर विमानाला आग लागली.

विमानातील वैमानिक प्रसंगावधान राखत पॅराशूटच्या मदतीने जमिनीवर सुखरूप उतरले. लेफ्टनंट तेजपाल हे वैमानिक भूमिका यांना प्रशिक्षण देत होते. यावेळी इंजिनमध्ये बिघाड होऊन आग भडकली. विमानातील दोघांनी पॅराशूटच्या मदतीने विमानातून बाहेर पडताक्षणी विमानाने जमिनीवर कोसळून पेट घेतला.

विमान दुर्घटनेत जखमी झालेल्या तेजपाल व भूमिका यांना कमांडो रुग्णालयात दाखल करण्यात आले आहे. चारच दिवसांपूर्वी बेळगावनजीक विमानात तांत्रिक बिघाड झाल्याने मोदगा गावाजवळ त्याचे आपत्कालीन लँडिंग झाले होते.

हवाई दलाच्यावतीने प्रशिक्षणासाठी वापरल्या जाणाऱ्या छोट्या विमानातील वैमानिकाने प्रसंगावधान राखत मोदगा गावाजवळील शेतवडीत विमान उतरविले होते. घटनेत वैमानिकाच्या पायाला किरकोळ दुखापत झाली होती.

अधिकारी, पोलिसांकडून पाहणी

विमान कोसळल्याचे वृत्त बोगापूर गावात वाऱ्यासारखे पसरताच ग्रामस्थांनी घटनास्थळी धाव घेतली. एचएएलचे अधिकारी व पोलिस अधिकाऱ्यांनी घटनास्थळी दाखल होऊन पाहणी केली.