ऑगस्टमध्ये लहानग्यांसाठी उपलब्ध होणार लस; आरोग्यमंत्र्यांनी दिली माहिती

नवी दिल्ली : कोरोनाच्या तिसऱ्या लाटेबाबत संशोधकांनी गंभीर इशारा दिला आहे. तिसऱ्या लाटेचा सर्वाधिक फटका लहान मुलांना बसू शकतो, अशी चेतावनी अनेक तज्ज्ञांनी दिली आहे. दरम्यान, या पार्श्वभूमीवरच एक महत्त्वाची बातमी सध्या समोर येत आहे. केंद्रीय आरोग्य मंत्री मनसुख मांडविय यांनी अशी माहिती दिली आहे की, ऑगस्ट महिन्यामध्ये लहान मुलांना दिली जाणारी कोरोना लस भारतामध्ये येऊ शकते. केंद्रीय आरोग्य मंत्र्यांनी ही माहिती मंगळवारी झालेल्या भाजपा संसदीय पक्षाच्या बैठकीत दिली आहे.या बैठकीत मांडवीय यांनी म्हटलंय की, सरकार पुढच्या महिन्यात लहान मुलांसाठी कोरोनाची लस देण्यास सुरु करेल. त्यांनी अशी देखील माहिती दिलीय की, भारत लवकरच सर्वांत मोठा लस उत्पादक देश बनेल कारण अधिकाधिक कंपन्यांना लशीच्या उत्पादनाचं लायसन्स मिळणार आहे.

शाळा उघडण्यास होईल फायदा

देशात आतापर्यंत जेवढ्या कोरोना लस दिल्या जात आहेत, त्या केवळ 18 वर्षे वयावरील लोकांनाच दिली जात आहे. तर आता 18 वर्षे वयाखालील मुलांना कोरोनाची लस देण्याबाबत तज्ज्ञांचं म्हणणं आहे की, यामुळे संक्रमणाची चैन तोडणं सोपं होईल. लहान मुलांना लस दिली गेल्यास शाळा उघडण्याच्या दिशेने देखील ठोस विचार करता येईल.

एम्सच्या प्रमुखांचंही सुचक वक्तव्य

लहान मुलांसाठीची लस सप्टेंबर महिन्यापर्यंत येईल, असं मत एम्सचे प्रमुख रणदीप गुलेरिया यांनी मांडलं आहे. त्यांनी काही दिवसांपूर्वीच असं मत मांडलं होतं की, देशात सप्टेंबर महिन्यापर्यंत लहान मुलांना कोरोनाची लस देण्यास सुरुवात होऊ शकते.