भाजप बहुमताच्या एकदम जवळ; कर्नाटक विधान परिषदेवर 7 उमेदवारांची बिनविरोध निवड

बंगळुरू : कर्नाटक विधान परिषदेच्या (Karnataka Legislative Council) द्विवार्षिक निवडणुकीत सर्व 7 उमेदवारांची बिनविरोध निवड झालीय. विधान परिषद निवडणूक (Karnataka Legislative Council Election) अधिकारी एम. के. विशालाक्षी यांनी सांगितलं की, 'या 7 जागांसाठी 3 जून रोजी निवडणूक घेण्याचा प्रस्ताव होता. मात्र, शुक्रवारी उमेदवारी अर्ज मागे घेण्याच्या शेवटच्या दिवशी केवळ 7 उमेदवार रिंगणात राहिले, त्यामुळं सर्वांची बिनविरोध निवड झाल्याचं घोषित करण्यात आलं.'

या 7 पैकी भाजपचे 4, काँग्रेस 2 (Congress) आणि JD (S) 1 उमेदवार निवडून आले आहेत. त्यामुळं कर्नाटकच्या उच्च सभागृहात भाजपला बहुमत मिळण्याचा मार्ग मोकळा झालाय. निवडून आलेल्या उमेदवारांमध्ये भाजपचे (BJP) उपाध्यक्ष आणि माजी उपमुख्यमंत्री लक्ष्मण सवदी (Laxman Savadi), पक्षाच्या राज्य युनिट सचिव हेमलता नायक, एस. केशवप्रसाद आणि अनुसूचित जाती आघाडीचे अध्यक्ष सी. नारायणस्वामी यांचा समावेश आहे.

तर, काँग्रेसकडून BMTC चे माजी अध्यक्ष एम. नागराजू यादव आणि कर्नाटक प्रदेश काँग्रेस कमिटीच्या अल्पसंख्याक सेलचे अध्यक्ष अब्दुल जब्बार यांची निवड झालीय. JD(S) च्या वतीनं माजी आमदार टी. ए. श्रावण यांची निवड करण्यात आलीय. 14 जून रोजी 7 विद्यमान सदस्यांचा कार्यकाळ संपत असल्यानं या जागांवर निवडणूक घेण्याची गरज होती.