छत्रपती संभाजीराजेंचा 'यांनी' ठरवून गेम केला; भाजप आमदाराचा नेमका निशाणा कोणावर?

सातारा : मराठा आरक्षणाच्या (Maratha Reservation) माध्यमातून छत्रपती संभाजीराजे (Chhatrapati Sambhajiraje) यांच्यामागं मोठा जनसमुदाय आहे. संपूर्ण राज्यातील युवक आणि मराठा समाज त्यांच्या मागं आहेत. मात्र, राज्यसभेची (Rajya Sabha Election) उमेदवारी देताना संभाजीराजेंचा ठरवून गेम करण्यात आला. त्यांच्या बाबतीत जे काही घडलं, कोणी घडवलं, हे सर्व संभाजीराजांना माहितीय. सर्वांनी छत्रपती संभाजीराजेंचा ठरवून गेम केलाय, अशी खरमरीत टीका आमदार शिवेंद्रसिंहराजे भोसले (Shivendrasinharaje Bhosle) यांनी केलीय. साताऱ्यातील जिल्हाधिकारी कार्यालयात बोंडारवाडी धरणाबाबत (Bondarwadi Dam) जिल्हाधिकाऱ्यांची भेट घेण्यासाठी आले असता ते माध्यमांशी बोलत होते.

शिवेंद्रराजे म्हणाले, मराठा समाजानं (Maratha Community) संभाजीराजेंच्या पाठीशी खंबीर उभं राहावं आणि छत्रपती संभाजीराजेंनी मराठा समाजाच्या माध्यमातून राज्याचं नेतृत्व करावं. छत्रपती संभाजीराजे हे आमच्या छत्रपती कुटुंबातील आहेत. मी त्यांच्यापेक्षा छोटा आहे. मात्र, संभाजीराजेंचं मराठा क्रांती मोर्चा आणि मराठा आरक्षण यामध्ये फार मोठं काम आहे. त्यांनी समाजाला एकत्र ठेवण्याचं काम केलंय. यावेळी त्यांची खासदारकी गेली असेल, पण योग्य वेळी काय निर्णय घ्यायचा ते पारखून निर्णय त्यांनी घ्यावा, असं त्यांनी सांगितलं.

संभाजीराजेंनी पश्चिम महाराष्ट्र, विदर्भ, मराठवाडा, खानदेश इथं त्यांनी मराठा समाजात जागृती केली. समाजाला एकत्र ठेवण्याचं काम केलं. संभाजीराजांच्या पुढील कारकिर्दीत मराठा समाजानं त्यांच्यासोबत रहावं. समाजासाठी स्थापन केलेल्या सकल मराठा संस्थेनंही त्यांच्या पाठीशी राहावं. कारण, त्यांचं समाजासाठी फार मोठं योगदान आहे. मराठा समाजातील कोणी माणूस पुढं जात असेल, तर आपण त्यांचे पाय ओढत असतो. त्यामुळं अशी भूमिका न घेता संभाजीराजेंना भविष्यात कशी मदत होईल, याचा विचार करावा, असं त्यांनी स्पष्ट केलं.