IAS टीना दाबी होणार महाराष्ट्राची सुनबाई; तिचा जोडीदार कोण आहे माहितीय?

जयपूर : राजस्थान केडरची 2016 बॅचची IAS आणि UPSC टॉपर असलेली टीना दाबी (IAS Tina Dabi) पुन्हा लग्न करणार आहे. टीना दाबीचा भावी जोडीदारही आयएएस आहे. प्रदीप गावंडे (IAS Dr. Pradeep Gawande) असं त्याचं नाव असून तो 2013 बॅचचा आयएएस आहे. दोघांनीही त्यांच्या इंस्टाग्राम अकाउंटवर एकत्र फोटो शेअर केलेत. मीडिया रिपोर्ट्सनुसार, दोघं 22 एप्रिलला जयपूरमधील एका खासगी हॉटेलमध्ये लग्नबंधनात अडकणार असल्याचं समजतंय.

आयएएस टीना दाबीनं यापूर्वी 2018 मध्ये अतहर खानशी लग्न केलं होतं. हे लग्न दोन वर्षांहून अधिक काळही टिकलं नाही. त्यानंतर दोघांनी परस्पर संमतीनं घटस्फोट घेतला. टीना दाबीचा होणारा नवरा प्रदीप हा महाराष्ट्रात जन्मला असून तो चुरू जिल्ह्याचा कलेक्टरही आहे. यूपीएससी करण्यापूर्वी प्रदीप यांनी एमबीबीएस केलं होतं.

टीना दाबी आणि प्रदीपनं इंस्टाग्रामवर एकत्र फोटो शेअर केलेत. या फोटो कॅप्शनमध्ये टीनानं लिहिलंय, ‘तुमच्यामुळं माझ्या आयुष्यात आनंद पुन्हा परत आलाय’, असं तिनं म्हंटलंय. कॅप्शनसोबत Fiance असा हॅशटॅगही टीनानं दिलाय. दोघांनी लाल रंगाचे कपडे घातलेले दिसत आहेत. मिळालेल्या माहितीनुसार, प्रदीप गावंडे यांचंही हे दुसरंच लग्न आहे. टीना दाबी ही मूळची दिल्लीची आहे. गेल्या वर्षी तिची बहीण रिया दाबी हिनंही पहिल्याच प्रयत्नात UPSC परीक्षा पास केली होती. रिया ही UPSC उत्तीर्ण करणाऱ्या सर्वात तरुण उमेदवारांपैकी एक ठरलीय. तिनं वयाच्या 23 व्या वर्षी परीक्षा उत्तीर्ण केलीय.