उन्नाव पिडितेच्या पत्राने भाजपची नाचक्की

उन्नाव - उन्नाव बलात्कार प्रकरणातील आरोपीच्या जवळच्या साथीदाराला जिल्हा पंचायत निवडणूकीसाठी उमेदवारी दिल्यानंतर काही तासांत केंद्रातील तसेच उत्तर प्रदेशातील सत्ताधारी भाजपची नाचक्की झाली. पिडीतेने राष्ट्रपती, पंतप्रधान आणि राज्याच्या मुख्यमंत्र्यांना पत्र लिहील्याने उमेदवार बदलणे भाजपला भाग पडले. उन्नावच्या बंगार्माऊ मतदारसंघात माजी आमदार कुलदीपसिंह सेंगर यांचा साथीदार अरुण सिंह याला तिकीट देण्यात आले होते. त्यामुळे सर्व बाजूंनी तीव्र प्रतिक्रिया आल्या.

२०१७ मधील या प्रकरणातील पिडीतेने राष्ट्रपती रामनाथ कोविंद, पंतप्रधान नरेंद्र मोदी आणि योगी आदित्यनाथ यांना पत्र धाडून दाद मागितली. अरुण हा नवाबगंज ब्लॉक पंचायतीचा प्रमुख आहे. त्याला तिकीट दिल्यास आपल्या जिवाला धोका असेल अशी भीती तिने व्यक्त केली. उमेदवार बदलावा अशी मागणीही तिने केली.

आधी इन्कार, प्रत्यारोप
भाजपचे जिल्हाध्यक्ष राजकिशोर रावत यांनी आधी हे आरोप फेटाळून लावले होते. याहून धक्कादायक म्हणजे हे आरोप निराधार असून हे विरोधकांचे षडयंत्र असल्याचा प्रत्यारोपही त्यांनी केला होता. याच रावत यांना नंतर माघार घ्यावी लागली. त्यांना नवे निवेदन जारी करावे लागले. पक्षनेतृत्वाच्या आदेशामुळे अरुण यांची उमेदवारी रद्द करण्यात आली आहे. आता दिवंगत माजी आमदार अजित सिंह यांची पत्नी शकुन निवडणूक लढवेल.

उपमुख्यमंत्र्यांकडून दखल
या प्रकरणाचे दिवसभर पडसाद उमटत होते. मिर्झापूर येथे उपमुख्यमंत्री केशवप्रसाद मौर्य यांना दखल घ्यावी लागली. अरुणला तिकीट देण्यात आल्याची माहिती आपल्याला मिळाली असून पक्षनेतृत्व योग्य निर्णय घेईल असे निवेदन त्यांनी मिर्झापूर येथे केले.

उन्नाव पिडीतेचे मुद्दे
- गुन्हेगारांविरुद्ध कडक कारवाईच्या गप्पा मारणाऱ्या भाजपकडून आपल्या वडीलांच्या खुनातील आरोपीला उमेदवारी
- माझ्या संपूर्ण कुटुंबाची वाट लावलेल्या सेंगरला भाजप सरकारचा अजूनही पाठिंबा
- आपल्या काकांना पोलिस कोठडीत टाकण्यात आले असून सेंगरच्या दडपणामुळे त्यांना पॅरोल नाकारला जातोय
- कुटुंबात कुणीही पुरुष सदस्य उरला नसल्यामुळे बहिणीच्या लग्नाचे प्रयत्न रखडले