उत्तराखंडचे मुख्यमंत्री पुष्कर सिंह धामी यांनी दिला राजीनामा

उत्तराखंडचे मुख्यमंत्री पुष्कर सिंह धामी (Pushkar Singh Dhami) यांनी मुख्यमंत्री पदाचा राजीनामा आज दिला आहे. मंत्रिमंडळाच्या बैठकीनंतर धामी यांनी राजीनामा दिला. त्यांनी राज्यपाल गुरमीत सिंग (Gurmit Singh) यांच्याकडे राजीनामा सुपूर्द केला. मात्र, राज्यपालांनी त्यांना नवीन सरकार स्थापन होईपर्यंत काम करत राहण्यास सांगितले आहे.

उत्तराखंडमध्ये भारतीय जनता पक्षाला (BJP) बहुमत मिळाले पण मुख्यमंत्री पुष्कर सिंह धामी यांचा पराभव झाला. यानंतर आता राज्याच्या नव्या मुख्यमंत्र्यांच्या चर्चेला उधाण आले आहे. दरम्यान, राज्याचे मुख्यमंत्री पुष्कर सिंह धामी यांनी आज याबाबत महत्त्वपूर्ण प्रतिक्रिया दिली आहे.

प्रतिक्रिया देताना पुष्कर सिंह धामी म्हणाले की, मी माझ्या पक्षाचा आणि पंतप्रधान मोदींचा आभारी आहे की त्यांनी मला जनतेच्या सेवेसाठी निवडले. उत्तराखंडमध्ये पहिल्यांदाच हा समज मोडला असून भाजपने २/३ बहुमताने सरकार स्थापन केले आहे. भविष्यातही आम्ही सर्व आश्वासने पूर्ण करू.

खातिमा मतदारसंघातून पुष्कर सिंह धामी यांचा पराभव

पुष्कर सिंह धामी खतिमा विधानसभा मतदारसंघातून निवडणूक हरले आहेत. भाजपच्या नेत्याचा काँग्रेसच्या भुवनचंद्र कापरी यांनी ६,५७९ मतांनी पराभव केला.