2019 चा जाहीरनामा वाचून दाखवत शेवाळेंनी जाहीर केला शिंदेंना पाठिंबा

नवी दिल्ली - शिवसेनेच्या ४० हून अधिक आमदारांनी बंडखोरी केल्यानंतर आता खासदारांनी देखील बंड पुकारला आहे. दिल्लीत आयोजित बैठकीत शिवसेनेचे लोकसभेतील नवे गटनेते राहुल शेवाळे यांनी १२ खासदारांच्या गटाची भूमिका स्पष्ट केली. (Rahul shewale News in Marathi)

राहुल शेवाळे म्हणाले की, आम्ही २०१९ मध्ये शिवसेना भाजप युतीतून निवडून आलो आहोत. शेवाळे यांनी २०१९ च्या निवडणुकीतील वचननामा वाचून दाखवत महाविकास आघाडीमध्ये तसं काहीच झालं नसल्याचं म्हणत एकनाथ शिंदेना पाठिंबा देत असल्याचं म्हटलं.

राहुल शेवाळे यांनी शिवसेनचा २०१९ लोकसभा निवडणुकीच्या वेळीचा जाहीरनामा वाचून दाखवला. हा जाहीरनामा उद्धव ठाकरे यांनीच बनवला होता. मात्र दुर्दैवाने महाविकास आघाडी झाली. त्यात कॉमन मिनिमम प्रोग्राम बनवण्यात आला. मात्र त्या कॉमन मिनिमम प्रोग्रामध्ये २०१९ च्या जाहिरनाम्याचा कुठेही उल्लेख नव्हता. मात्र एकनाथ शिंदे यांनी जो हिंदुत्वाचा संकल्प केला, त्याला पाठिंबा देण्यासाठी आम्ही सर्व १२ खासदार इथ हजर झालो आहोत, असं शेवाळे यांनी म्हटलं.

महाविकास आघाडीच्या काळात खासदाराचं खच्चीकरण झालं. मात्र त्या काळात शिंदे यांनी युडीच्या माध्यमातून पाठबळ दिलं. मात्र पक्ष नेतृत्वाकडून वेळ द्यायला हवा होता. तो देण्यात आला नाही, त्यामुळे हा प्रसंग ओढावला. नुकत्याच झालेल्या बैठकीत आम्ही शिवसेनेसोबत असल्याची भूमिका स्पष्ट केली होती. त्यावेळी आम्ही आमचा त्रास देखील उद्धव ठाकरे यांना बोलून दाखवला. तसेच एनडीएसोबत जाण्याचा सल्ला दिला. मात्र उद्धव ठाकरे महाविकास आघाडीसाठी ठाम होते, असंही शेवाळे यांनी नमूद केलं.