ममता बॅनर्जींनी दिल्लीत घेतली PM मोदींची भेट; म्हणाल्या...

नवी दिल्ली: पश्चिम बंगालच्या मुख्यमंत्री ममता बॅनर्जी या काल सोमवारी आपल्या पाच दिवसीय दौऱ्यासाठी दिल्लीला पोहोचल्या. त्यांनी आज मंगळवारी निवडणूक रणनितीकार प्रशांत किशोर यांच्यासहित काँग्रेसचे नेते आनंद शर्मा आणि कमलनाथ यांची भेट घेतली. त्यांनतर त्यांनी आज सायंकाळी चार वाजता पंतप्रधान नरेंद्र मोदी यांची भेट घेतली. या भेटीनंतर त्यांनी म्हटलंय की, पंतप्रधान मोदींशी कोरोना महासाथीबद्दल चर्चा झाली तसेच माझ्या राज्यासाठी लोकसंख्येच्या प्रमाणात लशीचा पुरवठा करण्याची देखील मागणी केली.

ममता बॅनर्जी यांनी पुढे म्हटलंय की, मी पंतप्रधा नरेंद्र मोदींना सांगितलंय की पश्चिम बंगालला कमी लस मिळाल्या असून आम्हाला आणखी लशींची गरज आहे. तसेच मी पंतप्रधानांना पेगॅसस हेरगिरी प्रकरणी सर्वपक्षीय बैठक बोलवण्याची देखील मागणी केली आहे. तसेच मी राज्याचे नाव बदलण्याचा प्रलंबित मुद्दा देखील उचलला आहे. यावर पंतप्रधानांनी लक्ष घालू असं उत्तर दिलं आहे. पुढे त्यांनी म्हटलंय की, मोदींशी झालेल्या चर्चेतील सगळ्याच बाबी सार्वजनिक केल्या जाऊ शकत नाहीत.