Belgaum : पती आईपासून विभक्त होत नव्हता म्हणून सुनेनं सासूचा केला खून; डोक्यात रॉडने हल्ला

बेळगाव : कौटुंबिक वादातून सुनेने सासू आणि पतीवर रॉडने केलेल्या हल्ल्यात सासूचा मृत्यू झाला, तर पतीही गंभीर जखमी झाला. ही घटना बैलहोंगल येथे मंगळवारी (ता. १३) सायंकाळी घडली. मेहबुबी याकुशी (वय ५३) असे मृत सासूचे नाव आहे.

मेहरून्नी सुबान याकुशी असे हल्लेखोर सुनेचे नाव आहे. याबाबत सुनेसह तिच्या दोन भावांवर गुन्हा दाखल झाला आहे. घटनेची नोंद बैलहोंगल पोलिस ठाण्यात (Bailhongal Police Station) झाली आहे. याबाबत माहिती अशी ः मेहरून्नीसा हिचा बैलहोंगल येथील सुबान याकुशी याच्यासोबत विवाह झाला होता.

विवाहानंतर सुबानची आई मेहबुबी आणि मेहरून्नीसा यांच्यात वारंवार भांडण होत असे. त्यामुळे मेहरून्नीसाने विभक्त होण्याचा हट्ट पतीकडे धरला होता. मात्र, त्यास सुबान तयार नव्हता. पतीने दुसरे घर बांधावे, असे मेहरून्नीसाला वाटत होते; पण सुबान आईपासून विभक्त होण्याच्या तयारीत नव्हता.

त्यामुळे त्यांच्यात वाद विकोपाला गेला. मंगळवारी सायंकाळी मेहरून्नीसाने आपल्या दोन भावांसह पती आणि सासूवर रॉडने हल्ला केला. त्यात मेहबुबी यांच्या डोक्याला मोठी दुखापत झाल्याने रक्तस्राव होऊन त्यांचा मृत्यू झाला, तर पती सुबान गंभीर जखमी झाला. सुबानवर रुग्णालयात उपचार सुरू आहेत. हल्ल्यानंतर मेहरून्नीसा आणि तिचे भाऊ फरार आहेत.