Narendra Modi : "केरळमध्ये कुस्ती, त्रिपुरात दोस्ती", PM मोदींचा काँग्रेस-डाव्या आघाडीला टोला

नवी दिल्ली : एका सभेत पंतप्रधान नरेंद्र मोदींनी त्रिपुरातील आगामी विधानसभा निवडणुकीसाठी काँग्रेस आणि डाव्या पक्षांच्या युतीची खिल्ली उडवली. शनिवारी त्रिपुरातील एका सभेला संबोधित करताना ते म्हणाले की, आज केरळमध्ये जे पक्ष 'कुस्ती' करत आहेत ते त्यांच्या फायद्यासाठी येथे एकत्र आले आहेत. (Narendra Modi news in Marathi)

पीएम मोदी पुढे म्हणाले की, काही इतर पक्षही विरोधकांच्या या आघाडीला पाठिंबा देत आहेत. पण मला जनतेला एवढेच सांगायचं की, तुमचे कोणतेही मत त्यांच्या वाट्याला गेले तर ते त्रिपुराचा विकास अनेक वर्षे मागे घेऊन जातील.

गोमती जिल्ह्यातील राधाकिशोरपूर येथे एका निवडणूक सभेत पंतप्रधान म्हणाले की, जे पक्ष वाईट कारभारासाठी ओळखले जातात ते आज 'देणग्या'साठी हातमिळवणी करत आहेत. हे तेच पक्ष आहेत जे केरळमध्ये 'कुस्ती' लढवत आहेत आणि त्रिपुरामध्ये 'दोस्ती' असल्याचं दाखवत आहेत.

दरम्यान विरोधकांना फक्त तुमच्या मताचे विभाजन करायचे आहे. मतांचे विभाजन करण्यासाठी काही छोटे पक्षही त्यांना पाठिंबा देत आहेत. त्यांना असे वाटते की असे केल्याने ते निवडणुकीचा निकाल बदलतील आणि त्यानंतर त्यांना त्यासाठी हवे ते मिळेल, असंही मोदी म्हणाले.