विधी अभ्यासक्रमाच्या प्रवेश अर्जात सुधारणा करण्यासाठी मुदतवाढ : सीईटी सेल

Pune News : तीन वर्षाच्या विधी अभ्यासक्रमाच्या (Law Syllabus) ऑनलाइन अर्जात सुधारणा, बदल करण्यासाठी, तसेच कागदपत्रे अपलोड करण्यासाठी रविवारपर्यंत (ता.२६ ) मुदतवाढ दिल्याचे राज्य सामाईक प्रवेश परीक्षा कक्षाचे (CET Cell) आयुक्त रवींद्र जगताप यांनी स्पष्ट केले आहे.

राज्यातील शासकीय, शासकीय अनुदानित, अल्पसंख्याक, विद्यापीठ संचालित, विनाअनुदानित खासगी महाविद्यालयांमध्ये शैक्षणिक वर्ष २०२१-२२ करिता तीन वर्षाच्या विधी पदवी अभ्यासक्रमाच्या प्रवेशासाठी केंद्रीय प्रवेश प्रक्रिया सुरू आहे. या प्रवेश प्रक्रियेतंर्गत ऑनलाइन अर्ज विद्यार्थ्यांकडून मागविण्याबाबत सूचना व प्रवेश प्रक्रियेचे वेळापत्रक राज्य सामाईक प्रवेश परीक्षा कक्षाच्या अधिकृत संकेतस्थळावर प्रसिद्ध करण्यात आले आहे.

तीन वर्षाच्या विधी अभ्यासक्रमासाठी ऑनलाइन अर्जात सुधारणा, बदल करण्यासाठी आणि दस्ताएवज बदलण्यासाठी २६ डिसेंबरपर्यंत प्रवेश परीक्षा कक्षाने मुदतवाढ दिली आहे.

या विधी अभ्यासक्रमासाठी इच्छुक असणाऱ्या विद्यार्थ्यांनी माहिती पुस्तिका, वेळापत्रक यांचा अभ्यास करून ऑनलाइन अर्ज भरावेत. तसेच अभ्यासक्रम राबविणाऱ्या शैक्षणिक संस्थांनी विद्यार्थ्यांना अर्ज भरण्यासाठी मदत करावी. यापुढील सर्व सूचना प्रवेश प्रक्रियेच्या संकेतस्थळावर प्रसिद्ध होतील, असेही रवींद्र जगताप यांनी स्पष्ट केले आहे.