अभियांत्रिकी अभ्यासक्रमाची अंतिम गुणवत्ता यादी बुधवारी होणार जाहीर

पुणे - राज्यातील शैक्षणिक संस्था, महाविद्यालयांमध्ये अभियांत्रिकी व तंत्रज्ञान अभ्यासक्रमाच्या (बी.ई /बी.टेक) प्रवेश प्रक्रियेतील अंतिम गुणवत्ता यादी बुधवारी (ता.१२) जाहीर होणार आहे.

राज्यातील सर्व सरकारी, अनुदानित, विद्यापीठांशी संलग्न, विद्यापीठातील विभाग आणि विनाअनुदानित महाविद्यालये, शैक्षणिक संस्थांमध्ये अभियांत्रिकी व तंत्रज्ञान पदवी अभ्यासक्रमाच्या (बी.ई आणि बी.टेक) पहिल्या वर्षाच्या आणि पदव्युत्तर पदवी अभ्यासक्रमांसाठीच्या (मास्टर ऑफ इंजिनिअरिंग ॲण्ड टेक्नॉलॉजी- इंटिग्रेटेड पाच वर्ष) प्रवेशासाठी ही प्रक्रिया राबविण्यात येत आहे. राज्य सामाईक प्रवेश परीक्षा कक्षामार्फत (सीईटी सेल) ही प्रवेश प्रक्रिया होत आहे.

यंदा अभियांत्रिकी व तंत्रज्ञान अभ्यासक्रमांच्या शैक्षणिक वर्ष २०२२-२३ करिता ‘कॅप’अंतर्गत प्रवेशासाठी तीन नियमित फेऱ्या होणार आहेत. प्रवेश प्रक्रियेतील पहिली फेरी १२ ते २१ ऑक्टोबर, दुसरी फेरी २२ ते ३१ ऑक्टोबर आणि तिसरी फेरी १ ते ९ नोव्हेंबर दरम्यान आयोजित केली आहे. राज्यातील सर्व अभियांत्रिकी महाविद्यालये, संस्थांचे शैक्षणिक वर्ष १ नोव्हेंबरपासून सुरू करावीत, अशी सूचना सीईटी सेलने दिली आहे. याबाबत अधिक माहितीसाठी विद्यार्थी-पालकांनी ‘https://cetcell.mahacet.org/’ या संकेतस्थळाला भेट द्यावी, असे आवाहनही सीईटी सेलने केले आहे.